"غبارِخاطر "میں تحریر کیے گئےکلاسک اشعار

شوریدگی کے ہاتھ سے سر ہے وبالِ دوش

صحرا میں اے خدا کوئی دیوار بھی نہیں

غالب

♦♥♦

کہیں نہ جائیں گے تا حشر تیرے کوچے سے

کہ پاؤں توڑ کے بیٹھے ہیں پائے بند ترے

شاد عظیم آبادیؔ

♦♥♦

لحد میں سوئے حسینوں کی لے کے تصویریں

پری وشوں سے نہ خالی بغل’ زمیں میں رہی

اسیرؔ

♦♥♦

راہ پر اُن کو لگا لائے تو ہیں باتوں میں

اور کھل جائیں گے دو چار ملاقاتوں میں

داغؔ

♦♥♦

کام تھے عِشق میں بہت ، پر میرؔ

ہم ہی فارغ ہوئے شتابی سے

♦♥♦

اہلِ معنی کو ہے لازم سخن آرائی بھی

بزم میں اہلِ نظر بھی ہیں، تماشائی بھی

حالیؔ

♦♥♦

لذّتِ معصیتِ عشق نہ پوچھ

خُلد میں بھی یہ بلا یاد آئی!

♦♥♦

سر پر ہجوم دردِ غریبی سے ڈالیے

وہ ایک مشتِ خاک کہ صحرا کہیں جسے

♦♥♦

ناکردہ گناہوں کی بھی حسرت کی ملے داد

یا رب، اگر ان کردہ گناہوں کی سزا ہے

♦♥♦

نقصان نہیں جنوں میں، بلا سے ہو گھر خراب

دو گز زمیں کے بدلے بیاباں گراں نہیں

♦♥♦

کون ایسا ہے جسے دست ہو دل سازی میں؟

شیشہ ٹوٹے تو کریں لاکھ ہُنر سے پیوند

♦♥♦

تھک تھک کے ہر مقام پہ دوچار رہ گئے

تیرا پتا نہ پائیں تو ناچار کیا کریں!

♦♥♦

دامن اُس کا تو بھلا دور ہے اے دستِ جنوں

کیوں ہے بیکار، گریباں تو مِرا دور نہیں!

♦♥♦

آجائے ایسے جینے سے اپنا تو جی بتنگ

آخر جئے گا کب تلک اے خضر؟ مر کہیں!

♦♥♦

کبھی حکایت رنجِ گراں نشیں لکھیے

کبھی شکایتِ صبرِ گریزپا کہیے

♦♥♦

سر پر ہجومِ دردِ غریبی سے ڈالیے

وہ ایک مشتِ خاک کہ صحرا کہیں جسے

♦♥♦

ہوس گُل کا تصور میں بھی کھٹکا نہ رہا

عجب آرام دیا بے پر و بالی نے مجھے

♦♥♦

ملے جو حشر میں’ لے لوں زبان ناصح کی

عجیب چیز ہے یہ طولِ مُدّعا کے لیے

♦♥♦

محرم نہیں ہے تو ہی نوا ہائے راز کا

یاں’ ورنہ جو حجاب ہے پردہ ہے ساز کا

♦♥♦

مجھے یہ ڈر ہے دل زندہ تو نہ مرجائے

کہ زندگانی عبارت ہے تیرے جینے سے

♦♥♦

دونوں جہاں دے کے وہ سمجھے یہ خوش رہا

یاں آ پڑی یہ شرم کہ تکرار کیا کروں

♦♥♦

کی ہم نفسوں نے اثرِ گریہ میں تقریر

اچھے رہے آپ اس سے’ مگر مجھ کو ڈبو آئے

♦♥♦

بیکاریِ جنوں میں ہے سر پیٹنے کا شغل

جب ہاتھ ٹوٹ جائیں تو پھر کیا کرے کوئی

♦♥♦

ہر چند ہو مشاہدہ حق کی گفتگو

بنتی نہیں ہے بادہ و ساغر کہے بغیر

♦♥♦

غلطی ہائے مضامین مت پوچھ

لوگ نالہ کو رسا باندھتے ہیں

♦♥♦

اِک عمر چاہیے کہ گوارا ہو نیشِ عِشق

رکھی ہے آج لذّتِ زخمِ جگر  کہاں؟

♦♥♦

کہتے ہُوئے ساقی سے حیا آتی ہے، ورنہ

یُوں ہے کہ مجھے دُردِ تہہِ جام بُہت ہے

♦♥♦

سُنتے ہیں جو بہشت کی تعریف’ سب درست

لیکن خدا کرے’ وہ تری جلوہ گاہ ہو

♦♥♦

خُدایا جذبہ دل کی مگر تاثیر الُٹی ہے

کہ جتنا کھینچتا ہُوں اور کھنچتا جائے ہے مجھ سے

♦♥♦

شکست و فتح نصیبوں سے ہے ولے اے میرؔ

مقابلہ تو دلِ ناتواں نے خوب کیا

♦♥♦

رہے اِک بانکپن بھی بے دماغی میں تو زیبا ہے

بڑھا دو چینِ ابرو پر ادائے کج کلاہی کو

♦♥♦

آنکھوں میں دُوں اُس آئینہ رُو کو جگہ ولے

ٹپکا کرے ہے بسکہ یہ گھر، نم بُہت ہے یاں

♦♥♦

سوداؔ خُدا کے واسطے کر قصہ مختصر

اپنی تو نینداُڑ گئی تیرے فسانے میں

♦♥♦

جاتی ہے کوئی کش مکش اندوہِ عشق کی

دل بھی اگر گیا’ تو وہی دل کا درد تھا

♦♥♦

پیدا کہاں ہیں ایسے پراگندہ طبع لوگ

افسوس تم کو میرؔ سے صحبت نہیں رہی

♦♥♦

جانا پڑا رقیب کے در پر ہزار بار

اے کاش جانتا نہ تِری رہگزر کو مَیں!

♦♥♦

ہے غیبِ غیب، جس کو سمجھتے ہیں ہم شہود

ہیں خواب میں ہنوز، جو جاگے ہیں خواب میں

♦♥♦

باتیں جو تم نے آج یہ چھیڑیں ملال کی

پھر کیا رہی نشاط تمھارے وصال کی

♦♥♦

حالت نہ پوچھیے مرے شیب و شباب کی

دو کروٹیں تھیں عالمِ غفلت میں خواب کی

محسن کاکوری

♦♥♦

کمر باندھے ہوئے چلنے پہ یاں سب یار بیٹھے ہیں

بہت آگے گئے، باقی جو ہیں تیار بیٹھے ہیں

میرانشا

♦♥♦

نہ کر اے یاس! یوں برباد میرے خانہ دل کو

اسی گھر میں جلایا ہے چراغِ آرزو برسوں

امیرمینائی

♦♥♦

اب لکھیں گے شکوہ بیداد ہم دل کھول کر

نام اُن کا آسماں ٹھہرالیا تحریر میں

ناظمؔ

♦♥♦

پنجہ شانہ سے تو زلفِ گرہ گیر نہ کھینچ

دل سے دیوانے کو مت چھیڑ ، یہ زنجیر نہ کھینچ

مومنؔ

♦♥♦

احباب چارہ سازیِ وحشت نہ کر سکے

زنداں میں بھی خیال بیاباں نورد تھا

غالبؔ

♦♥♦

لطفِ مَے تجھ سے کیا کہوں واعظ

ہائے، کمبخت! تو نے پی ہی نہیں

داغؔ

♦♥♦

بھول کر، او چاند کے ٹکڑے! اِدھر آ جا کبھی

میرےویرانے میں بھی ہو جائے دم بھر چاندنی

ناسخؔ

♦♥♦

بہت رہا ہے کبھی لطفِ یار ہم پر بھی

گذر چکی ہے یہ فصلِ بہار ہم پر بھی

اکبرؔ

♦♥♦