اُجڑے ہوئے لوگوں سے گریزاں نہ ہُوا کر

حالات کی قبروں کے یہ کتبے بھی پڑھا کر

کیا جانیے کیوں تیز ہَوا سوچ میں گم ہے؟

خوابیدہ پرندوں کو درختوں سے اُڑا کر

ہر وقت کا ہنسنا تجھے برباد نہ کر دے

تنہائی کے لمحوں میں کبھی رو بھی لیا کر

وہ آج بھی صدیوں کی مسافت پہ کھڑا ہے

ڈھونڈا تھا جسے وقت کی دیوار گِرا کر

٭٭٭٭٭

یہ دل یہ پاگل دل مرا کیوں بجھ گیا آوارگی!

اِس دشت میں اک شہر تھا، وہ کیا ہُوا آوارگی

کل شب مجھے بے شکل کی آواز نے چونکا دیا

میں نے کہا تُو کون ہے’ اُس نے کہا "آوارگی”

یہ درد کی تنہائیوں’ یہ دشت کا ویراں سفر

ہم لوگ تو اُکتا گئے، اپنی سُنا آوارگی!

اک اجنبی جھونکے نے جب پوچھا مرے غم کا سبب

صحرا کی بھیگی ریت پر میں نے لکھا "آوارگی”

کل رات تنہا چاند کو دیکھا تھا میں نے خواب میں

محسنؔ مجھے راس آئے گی شاید سدا "آوارگی”

٭٭٭٭٭

اے دل تجھے دشمن کی بھی پہچان کہاں ہے؟

تُو حلقہ یاراں میں بھی محتاط رہا کر!

پہلا سا کہاں اب مری رفتار کا عالم!

اے گردشِ دوراں ذرا تھم تھم کے چلا کر

اِس شب کے مقدّر میں سحر ہی نہیں محسنؔ

دیکھا ہے کئی بار چراغوں کو بجھا کر

٭٭٭٭٭

 کہاں سے لاؤں ترا عکس اپنی آنکھوں میں

یہ لوگ دیکھنے آتے ہیں آئینے تیرے

یہ درد کم نہیں ہے کہ تُو، ہمیں نہ مِلا

یہ اور بات کہ ہم بھی نہ ہو سکے تیرے

کسے خبر کہ ہمیں اب بھی یاد ہیں محسنؔ

وہ کروٹیں شبِ غم کی وہ حوصلے تیرے

٭٭٭٭٭

میں دل پہ جبر کروں گا، تجھے بھُلا دوں گا

مروں گا خود بھی تجھے بھی کڑی سزا دوں گا

یہ تیرگی مرے گھر کا ہی کیوں مقدّر ہو؟

میں تیرے شہر کے سارے دیئے بجھا دوں گا

وفا کروں گا کسی سوگوار چہرے سے!

پُرانی قبر پہ کتبہ نیا سجا دوں گا

بڑھا رہی ہیں میرے دُکھ، نشانیاں تیری

میں تیرے خط، تری تصویر تک جلا دوں گا

٭٭٭

بچھڑ کے مجھ سے کسی تُونے یہ بھی سوچا ہے

اَدھورا چاند بھی کتنا اُداس لگتا ہے

یہ رکھ رکھاؤ محبت سکھا گئی اُس کو

وہ روٹھ کر بھی مجھے مسکرا کے ملتا ہے

٭٭٭٭٭

 بڑے خلوص سے ملتا ہے؛ جب بھی ملتا ہے

وہ بے وفا تو نہیں ہے’ بہانہ جُو ہی سہی

یہ ناز کم تو نہیں ہے کہ اُن سے مل آئے

وہ ایک پل کو سرِ راہ گفتگو ہی سہی

٭٭٭٭٭

کب سے اپنی تلاش میں گم ہوں

اے خدا مجھ کو مجھ پہ افشا کر

اے بچھڑ کر لَوٹنے والے!

دُکھ کی راتوں میں یاد آیا کر

اے مرے کچھ نہ سوچنے والے!

اپنے بارے میں کچھ تو سوچا کر

کون بانٹے گا دکھ ترے مُحسنؔ؟

دوستوں سے بھی چُھپ کے رویا کر

٭٭٭٭٭

خود اپنی ذات کا غم بھی شریکِ حال رہا

وگرنہ ہم تیرے غم سے کہاں بہلتے تھے!

وہ دَور بیت گیا جب ترے بغیر ہمیں

تمام شہر کے رستے اُداس لگتے تھے!

٭٭٭٭٭

ساتھ دیتا ہے کون منزل تک؟

ساتھ چلتی ہے رہگزر تنہا

وہ جو ہنستا تھا اہلِ دل پہ کبھی

رو پڑا خود کو دیکھ کر تنہا

یہ خداؤں کا دَور ہے اس میں

رہ گیا ہے فقط بشر تنہا

٭٭٭٭٭

 غزل کہوں ، کبھی سادہ سے خط لکھوں اُس کو

اُداس دل کے لیے مشغلے تلاش کروں!

مرے وجود سے شاید ملے سراغ ترا

میں خود کو بھی ترے واسطے تلاش کروں

٭٭٭٭٭

منزل پہ جو پہنچا ہوں تو معلوم ہُوا ہے!

خود اپنے لیے راہ کی دیوار بھی میں تھا

اب میرے تعارُف سے گریزاں ہے تُو لیکن

کل تک تری پہچان کا معیار بھی میں تھا

٭٭٭٭٭

 تم تو نزدیکِ رگِ جاں تھے، تمھیں کیا کہتا ؟

میں نے دشمن کو بھی دشمن نہیں سمجھا یارو

کیا کہوں گُل ہے کہ شبنم وہ غزل ہے کہ غزال؟

تم نے دیکھا ہی نہیں اُس کا سراپا یارو

کون تنہا رہے اِک عمر کسی کی خاطر؟

وہ جو مل جائے تو اُس سے بھی یہ کہنا یارو

٭٭٭٭٭

ختم ہونے کو ہے سفر شاید

پھر ملیں گے کبھی۔۔۔مگر شاید

 پھر مِلا اذنِ آبلہ پائی۔۔۔!

پھر بھٹکنا ہے در بدر شاید

شہر میں روشنی کا میلہ ہے 

جل گیا پھر کسی کا گھر شاید

٭٭٭٭٭

اِدراک پر محیط ہے ارض و سما کا دُکھ

اِس سے پرے بھی جو ہے وہ ہے ماورا کا دُکھ

کیوں اِن دنوں سوار ہے دو کشتیوں پہ دل

چاہت اک اجنبی کی تو اِک آشنا کا دُکھ

٭٭٭٭٭

اشک اپنا کہ تمہارا’ نہیں دیکھا جاتا

اَبر کی زد میں ستارہ’ نہیں دیکھا جاتا

 تیرے چہرے کی کشش تھی کہ پلٹ کر دیکھا

ورنہ سورج تو دوبارہ نہیں دیکھا جاتا

٭٭٭٭٭

تم میرا بدن اوڑھ کے پھرتے رہو۔لیکن

ممکن ہو تو اِک مِرا چہرہ مجھے دینا

چھُو جائے ہوا جِس سے تو خوشبو تِری آئے

جاتے ہوئے اِک زخم تو ایسا مجھے دینا

اِک درد کا میلہ کہ لگا ہے دل و جاں میں

اِک روح کی آواز کہ ” رستہ مجھے دینا”

٭٭٭٭٭

خوشبو ہے’ دھنک ہے چاندنی ہے

وہ اچھے دِنوں کی شاعری ہے

آنکھوں میں گلاب کِھل رہے ہیں

کیا جانے وہ کب سے جاگتی ہے؟

پَل بھر کو سَرک گیا جو آنچل

کلیوں کی طرح سِمٹ گئی ہے

آئینہ ہی دیکھتا ہے اُس کو

آئینہ کہاں وہ دیکھتی ہے؟

میں اُس کی رفاقتوں پہ نازاں

محسنؔ وہ غرورِ دوستی ہے

٭٭٭٭٭

فن کار ہے تو ہاتھ پہ سورج سجا کے لا

بجھتا ہوا دیا نہ مقابل ہوا کے لا

پیماں وفا کے باندھ مگر سوچ سوچ کر

اِس ابتدا میں یوں نہ سخن اِنتہا کے لا

تھوڑی سی اور موج میں آ’ اے ہوئے گُل

تھوڑی سی اُس کے جِسم کی خوشبو چُرا کے لا

٭٭٭٭٭

 اتنی مُدت بعد ملے ہو!

کن سوچوں میں گم پھرتے ہو؟

اِتنے خائف کیوں رہتے ہو؟

ہر آہٹ سے ڈر جاتے ہو

تیز ہوا نے مجھ سے پوچھا

ریت پہ کیا لکھتے رہتے ہو؟

کاش کوئی ہم سے بھی پوچھے

رات گئے تک کیوں جاگے ہو؟

میں دریا سے بھی ڈرتا ہوں

تم دریا سے بھی گہرے ہو!

کون سی بات ہے تم میں ایسی

اِتنے اچھے کیوں لگتے ہو؟

جاؤ جیت کا جشن مناؤ!

میں جھوٹا ہوں’ تم سچے ہو

کہنے کو رہتے ہو دل میں!

پھر بھی کتنے دُور کھڑے ہو

ہم سے نہ پوچھو ہجر کے قصّے

اپنی کہو اب تم کیسے ہو؟

٭٭٭٭٭

نئی طرح سے نبھانے کی دل نے ٹھانی ہے

وگرنہ اُس سے محبت بہت پرانی ہے

خدا وہ دن نہ دکھائے کہ میں کسی سے سُنوں

کہ تو نے بھی غمِ دنیا سے ہار مانی ہے

ہمیں عزیز ہو کیونکر نہ شام غم کہ یہی

بچھڑنے والے تیری آخری نشانی ہے

میں کتنی دیر اُسے سوچتا رہوں محسنؔ

کہ جیسے اُس کا بدن بھی کوئی کہانی ہے

٭٭٭٭٭

وہ لڑکی بھی ایک عجیب پہیلی تھی

پیاسے ہونٹ تھے آنکھ سمندر جیسی تھی

دُور سے اُجڑے مندر جیسا گھر اُس کا

وہ اپنے گھر میں اکلوتی دیوی تھی!

سب پر ظاہر کر دیتی تھی بھید اپنا

سب سے اک تصویر چھپائے رکھتی تھی

٭٭٭٭٭

 ہم تو بیٹھے تھے رہگذر میں گُم

قافلے ہو گئے غُبار میں گُم

جب تلک آئینہ مقابل تھا

اُس کی آنکھیں رہیں خُمار میں گُم

ہم سے مت پوچھ کب رتیں بدلیں

ہم رہے اُس کے انتظار میں گُم

٭٭٭٭٭

 ہم سے مت پوچھو راستے گھر کے

ہم مسافر ہیں زندگی بھر کے

صُلح کر لی یہ سوچ کی میں نے

میرے دشمن نہ تھے برابر کے

خود سے خیمے جلا دیئے میں نے

حوصلے دیکھنا تھے لشکر کے

آنکھ نم بھی کرو تو بس اتنی

رنگ پھیکے پڑیں نہ منظر کے

کجکلاؤں سے لڑ گئے محسنؔ

ہم بھکاری حسینؔؑ کے دَر کے

٭٭٭٭٭

ذکرِ شبِ فرا ق سے وحشت اُسے بھی تھی

میری طرح کسی سے محبت اُسے بھی تھی

مجھ کو بھی شوق تھا نئے چہروں کی دید کا

رستہ بدل کے چلنے کی عادت اُسے بھی تھی

وہ مجھ سے بڑھ کے ضبط کا عادی تھا’ جی گیا

ورنہ ہر ایک سانس قیامت اُسے بھی تھی

سنتا تھا وہ بھی سب سے پُرانی کہانیاں!

شاید رفاقتوں کی ضرورت اُسے بھی تھی

محسنؔ میں اُس سے کہہ نہ سکا یوں بھی حالِ دل

درپیش ایک تازہ مصیبت اُسے بھی تھی

٭٭٭٭٭

بھری بہار میں اب کے عجیب پھول کھلے؟

نہ اپنے زخم ہی مہکے نہ دِل کے چاک سِلے

کہاں تلک کوئی ڈھونڈے مسافروں کا سُراغ؟

بچھڑنے والوں کا کیا ہے’ ملے ملے نہ ملے

یہ حادثہ سرِ ساحل رُلا گیا سب کو!

بھنور میں ڈوبنے والوں کے ہاتھ بھی نہ ہِلے

سِناں کی نوک کبھی شاخِ دار پر محسنؔ

سخنوروں کو ملے ہیں مُشقتوں کے صِلے!!

٭٭٭٭٭