اسلم کولسریؔ شاعری (بی-اے مقالہ)

   حَرفے چَند  جب مجھے اسلم کولسری ؔ پہ تحقیقی مقالہ لکھنے کا کہا گیا، تب تک میں نے صرف آپ کا ایک شعر ہی سن رکھا تھا۔ شہر میں آکر پڑھنے والے بھول گئے کس کی  ماں نے کتنا  زیور بیچا  تھا یہ شعر ، شاعر کے خیال کی بلندی کا شاہد ہے لیکن میں تذبذب کا شکار تھا کہ کہیں میں اپنا وقت  تو ضائع نہیں کر وں گا۔ خیر اس سوچ کے با وجود میں اردو بازار میں تھا اور میرے ہاتھ میں آپ کی چار کتابیں بھی تھیں۔ جوں  جوں میں شعر پڑھتا گیا توں توں مجھے یقین آیا کہ میرا وقت ضائع نہیں ہو گا۔ مجھے ایک" شاعر" کو تفصیل سے پڑھنے کا موقع ملے گا  اور میرے علم اور خیال کو وسعت ملے گی۔  اسلم ؔ کولسری کا نام کسی تعارف کا محتاج نہیں۔ انہیں تمام ادبی حلقوں میں عزت کی نگاہ سے دیکھا جاتا ہے۔انھوں نے بہت سی اصناف میں شاعری کی لیکن اس مقالے میں صرف ان کی غزل کو موضوع بنایا گیا ہے۔ اب تک آپ کے نو شعری مجموعے چھپ چکے ہیں۔ تحقیق کے دوران مجھے جس مشکل کا سب سے زیادہ سامنا کرنا پڑا وہ مواد کی تلاش تھی۔اس لیے مقالے کی تحقیق میں اگر کہیں کمی رہ گئی ہو تو، تو اُسے تحقیق کے میدان میں مجھے نو وارد جان کر صرفِ نظر کیجیے گا۔زیرِ نظر مقالے کو تین ابواب میں تقسیم کیا گیا ہے۔ پہلا باب اسلمؔ کولسری کے حالات ِ زندگی اور شخصیت پر  مشتمل ہے۔ دوسرے باب میں اسلمؔ کولسری کی غزل کا جائزہ لیا گیا ہے۔ اس میں چند احباب کی آرا بھی پیش کی گئی ہیں۔ تیسرے باب میں مقالے کا لبِ لباب  (محاکمہ) پیش کیا گیا ہے۔ اب جب کہ یہ مقالہ جانچنے کے لیے پیش کیا جا رہا ہے، سب سے پہلے میں نگرانِ مقالہ اُستادِ محترم ڈاکٹر اختر شمار  کا تہِ دل سے ممنوں ہوں جن کی شفقت اور مجھ پہ بے حد اعتماد کی وجہ سے یہ مقالہ اپنے اختتام کو پہنچا۔ اور میں اُردو ادب کے تمام اساتذہ کا شکر گزار ہوں جن کی شاگردی میں میری ادبی و علمی استعداد میں اضافہ ہوا۔ میں  اسلمؔ کولسری صاحب کا بھی شکریہ ادا کرتا ہوں جن سے ملاقات سے مجھے بہت کچھ سیکھنے کو ملا اور میں اپنے دوستوں کا بھی ممنون ہوں۔جنہوں نے میری حوصلہ افزائی کی۔ خداوندِقدوس ان سب کو اپنی رحمتوں کے سائے میں رکھے! آمین     …

0 Comments

غزل کا سودائیؔ رنگ

تعارف اردو  شاعری کا چمن جن خوش رنگ اور معطر گلوں سے مزین ہے۔ ان  میں اگر سوداؔکا ذکر نہ کریں تو تمام رنگ پھیکے اور فضا بوجھل معلوم ہو گی۔میری کہا ں یہ مجال کہ میں ان کی مدح سرائی میں کچھ کہوں،خود میر تقی میر جنہیں تمام بڑے شاعر، بڑا شاعر گردانتے ہیں۔جب ان سے کسی نے پوچھاــــ ـ،ــ"کیوں حضرت !  آج کل شاعر کون کون ہے؟ فرمایا ایک تو یہ خاکسار ۔دوسرا سودا۔"(۱)میرا موضوع سخن سودا کی غزل ہے لیکن اس سے پہلے سودا کے زندگی نامے سے  واقفیت اس لیے بھی ضروری ہے کیونکہ کسی بھی فنکار کا فن اس کے حالات کا پر تو ہوتا ہے ۔غبار زندگی ،نکھار فن بن کر ابھرتا ہے۔ بہر طور شاعر کا حسن خیال کہیں نہ کہیں  اس کے حالات سے ہی نمود  پاتا ہے،جیسے کنول کا پھول۔۔۔  آپ کا نام مرزا محمد رفیع  تھا۔سودا تخلص فرماتے۔  ا ٓبائو اجداد کابل کے رہنے والے تھے ۔والد مرزا محمد شفیع کا کاروبار زندگی تجارت تھا۔بغرض تجارت ہندوستان کا رخ کہا اور یہیں کے ہو کر رہ گئے۔دلی میں مقیم ہوئے ۔ یہیں اس نور چشم کی ولادت ہوئی جس نے بعد ازاں  اپنا ہونا بحثیت عظیم شاعر منوایا۔مقام پیدائش تو سب کو معلوم لیکن سن پیدائش ابھی بھی معمہ ہے، جمیل جالبی نے مختلف تذکرہ  نگاروں کے بتائے ہوئے سال پیدائش پر بحث کر کے سن ولادت 1706ء متعین کیا ہے۔(۲)سودا کی آنکھ جس زمیں پر کھلی تھی اس کی سرشت میں اتنی زرخیزی ضرور تھی کہ  وہ اس بیج کو نمود بخشے  اور ایک گھنا ، سایہ دار شجر بنا سکے۔ آپ نے مختلف علوم و فنون ، طب،منطق،فلسفہ،علم الکلام،نجوم،ہیئت،عربی و فارسی،ادب و انشاء گو کہ سب ہی آپ کے شوق کا مرکز بنے۔مرزاؔکی طبعیت شگفتہ،ٓزاد مزاجی اور تفریح پسندی کی طرف مائل تھی۔ آپ نے کچھ عرصہ ملازمت بھی کی لیکن یہ مزاج آڑے آگیا اور ملازمت سے کنارہ اختیارکرلیا۔  سودا  شعرو سخن کی جانب متوجہ ہوئے تو سب سے پہلے سلیمان قلی خان داود کے شاگرد ہوئے اور پھر شاہ حاتم کی شاگردی اختیار کی۔مرزا کے سخن کا ستارہ اپنی اوج پہ تھا کہ آپ کے استاد شاہ حاتم نے اپنے دیوان کی تدوین کی تو شاگردوں کے ناموں میں سودا کا نام سرفہرست لکھا،اس بات نے آپ کی شہرت کو مزید چار چاند لگا دییـــ۔ آپ نے سب سے پہلے فارسی میں شعر کہنا شروع کیے لیکن پھرخان آرزو کے کہنے پر اردو کی جانب راغب ہوئے۔مرزا کا طبعی رجحان قصائداور ہجویات کی جانب تھادہلی نے بہت سے شاعر اور شاعر گر پیدا کیے۔لیکن دہلی کے جب حالات خراب ہوئے تو آپ نواب عمادالملک کے ہمراہ فرخ آباد چلے گئے،کچھ مدت فرخ آباد میں گزارنے کے بعدسودا فیض آباد پہنچے تو وہاں نواب شجاع الدولہ نے آپ کی خوب خاطر مدارت کی، بعد ازاں نواب آصف الدولہ کے دور میں  اطمینان اور فارغ البالی کی زندگی گزاری،چھ ہزار سالانہ وظیفہ مقرر تھا۔ سودا  نہ مفلس تھے اور نہ ہی صوفی۔باپ سے خاطر خواہ دولت وراثت میں ملی تھی ،مجموئی طور پر زندگی بڑی فراغت سے گزری،سو طبعیت میں شوخی اور شخصیت میں  اعتماد کا ہونا لازم تھا۔میر تقی میر نے اپنے تذکرہ میں سودا کوــــــــــ ــ  "خوش خلق،خوش خو،گرم جوش،یار باش اور شگفتہ رو لکھا ہے۔"(۳) شاعری کا دیوان لکھتے لکھتے آخر کار یہ رجل با مراد  1781ء کو اپنی زندگی کا دیوان بند کیے اس دنیا سے کوچ کر گیا۔  غزل کی باتمرزا محمد رفیع سودا ایک ہمہ رنگ اور ہمہ جہت شاعر تھے۔انہوں نے غزل ،قصیدہ،مرثیہ،مثنوی،رباعی،قطعہ،مسدس،اور مخمس میں اپنی شاعری کے رنگ بھرے۔سودا کو بنیادی طور پر قصیدہ کا شاعر کہا جاتا ہے،یہ بجا کہ سودا کا قصیدہ ان کی پہچان بنا لیکن ساتھ ہی انہوں نے اس زمانے کے تمام روایتی موضوعات کواس کمال فن سے غزل کے پیرہن میں ڈھالا ہے کہ آج بھی  جہاں میر تقی میر کا نام آئے گا سودا کا ذکر  بھی ہو گا۔  اور شیفتہ کا جملہ سنیے۔۔۔!                             "ان کا قصیدہ غزل سے بہتر ہے اور غزل قصیدے سے بہتر ہے۔"(۴)اور اس پہ سودا کا اپنا شعر دلیل ہے۔        وہ  جو کہتے ہیں کہ سودا کا  قصیدہ ہے خوب       ان کی خدمت میں لئے میں یہ غزل جائوں گاسودا کی غزل پہ بات کی جائے تو تذکرہ نگا کہتے ہیں کہ سودا کی غزل واردات قلبیہ سے سراسر خالی ہے۔ان کا انداز بیانیہ اور رنگ خارجی ہیوہ اپنے اندر گہرا نہیں اترتے،اس لیے ان کا کلام  کانوں میں گونج تو پیدا کرتا ہے لیکن رگ جاں میں نہیں بہتا۔اور سند کے طور پر بیانِ واقعہ کی یہ صورت دیکھیے۔شیخ نے اس بت کو  جس کوچے میں دیکھا شام کولے…

0 Comments

End of content

No more pages to load