پہیلیاں

ایک تھال موتیوں سے بھرا

سب کے سر پر اوندھا دھرا

چاروں اور وہ تھالی پِھرے

موتی اس سے ایک نہ گرے

(جواب): آسمان

 

آگ لگے میرے ہی بَل سے

ہر انسان کے آتی کام

دن میں پودے مجھے بناتے

اب بتلاؤ میرا نام

(جواب): آکسیجن گیس

 

ایک پھل اوپر سے ہرا

اندر سے سینہ لال

رس سے بھرا ہوا ہے سارا

کھانے میں لگتا وہ پیارا

(جواب): تربوز

 

ایک جانور اصلی

جس کی ہڈی نہ پسلی

(جواب): جونک

 

ایک ڈبے میں بتیس دانے

بوجھنے والے بڑے سیانے

(جواب): دانت

 

اک راجا کی انوکھی رانی

دُم کے رستے پیتی پانی

(جواب): چراغ، دیا

 

شام سمے(وقت)اک پنچھی آوے

ٹُک دیکھے اور چھپ چھپ جاوے

سمجھ کے کہنا قسم ہے تم پر

آگ بِنا اُجالا دُم پر

(جواب): جگنو

ایک جان دیکھی بے جان

بولتی ہے پر نہیں زبان

بیچ بازار کرے کاروبار

سچ جھوٹ کا کرے اظہار

دن کو رات کو کبھی نہ ڈرے

سچ بات ہمیشہ کرے

(جواب): ترازو

 

ایک چیز ایسی کہلائے

ہر مذہب کا آدمی کھائے

(جواب): قسم کھانا

 

ایک ہی شکل ایک ہی نام

بیچ میں اس کے رہتا کام

بول نہ جانیں سُنتے سنگ

ان دونوں کے بیچ سُرنگ

(جواب): کان

 

ایک سینگ کی ایسی گائے

جتنا دو اتنا ہی کھائے

کھاتے کھاتے گانا گائے

پیٹ نہیں، اس کا بھر پائے

(جواب): چکّی

 

ایک نام کے دو کہلائیں

ایک کو چھوڑیں ایک کو کھائیں

(جواب): انار

 

ایک قلعے میں نو دس پریاں

آپس میں سر جوڑے کھڑیاں

(جواب): نارنجی، مالٹا

 

تین حرفوں کا میرا نام

کھانے کے میں آتا کام

الٹا سیدھا ایک سمان

نہ میں لڈو نہ میں پان

(جواب): نان

 

چڑھے ناک پر پکڑے کان

بچو بولو کون شیطان

(جواب): عینک

 

چھوٹے بڑے سبھی کو بھائے

بوجھ سکے تو بوجھ

گول مٹول، رنگ ہے پیلا

پیٹ میں داڑھی مونچھ

(جواب): آم

 

چھم چھم کر کے شور مچائے

سوتوں کو وہ آن جگائے

آسماں سے گرتی جائے

روتوں کو وہ آن ہنسائے

(جواب): بارش

 

ذرا سی ہلدی

سارے گھر میں مل دی

(جواب): بلب کی روشنی

 

رات کے وقت کچھ موتی آئیں

دھوپ کے آتے ہی مٹ جائیں

(جواب): شبنم

 

رنگ بادامی شکل میں انڈے

ابال کو اُن کو کرتے ٹھنڈے

چھلکے ان کے اتارے جاتے

ڈال مسالہ خوب بناتے

(جواب): آلو

 

ہرا آٹا، لال پراٹھا

(جواب): مہندی