تحریر: علی احمد

ہمارے گھر میں پودوں کی ایک چھوٹی سی دنیا ہوا کرتی تھی جن کا سربراہ جامن کا پیڑ اور اہل خانہ میں ایک لیموں کا پودا جس پہ خوب لیموں لگتے اور ہماری ضرورت پوری کرتے۔۔انگور کی بیل، امرود کا درخت ، دھنیا، مرچوں کا پودا اور موتیا پورے گھر کو مہکاتا تھا۔میں  اکثر ان کی صحبت میں رہتا۔

مجھے یہ سر سبز دُنیا  بہت عزیز تھی۔  میں پڑھائی کی غرض سے شہر سے کوچ کر گیا اور وقت کے ساتھ ساتھ ان سے بے اعتنائی   برتی گئی۔۔۔ انگور کی بیل، امرود کا درخت، دھنیا اور مرچوں کا پودا یہ سب ہم سے روٹھ گئے۔۔۔

جامن کا پیڑ ،ہماری بے وفائی کے با وجود ہمارے آنگن کو سایہ مہیا کرتا رہا۔  میرا جب بھی گھر آنا ہوتا تو امّی شکایت کرتی یہ تمہارا چہیتا بہت گند بکھیرتا ہے اس پہ وہ اسرار کرتیں کہ اسے کٹوا دیتے ہیں۔  یہ باتیں سُن کہ مجھے دُکھ ہوتا اور میں خفا ہو جاتا ۔

ایک دن بات اتنی آگے بڑھی کہ میں نے اپنا فیصلہ سُنا دیا کہ اگر اس درخت کو بے دخل کیا گیا تو میں  بھی واپس  گھرنہیں آؤں گا۔  امی کو یہ کب گوارا تھا کہ بیٹا گھرچھوڑے اس طرح پیڑ کو بھی رہنے کی اجازت مل گئی۔  جب تک ہم اُس گھر میں رہے اس کی کانٹ چھانٹ تو ہوتی رہی لیکن اسے کاٹا نہیں گیا۔۔ ۔

 چند مہینے ہوئے ہم نے وہ گھر بیچ دیا۔۔اب سُنا ہے کہ خریداروں نے پیڑ کاٹ دیا ہے اور صحن کو کشادہ کر لیا ہے۔۔۔

یہ بات مجھے انتطار حسین صاحب کا ایک جملہ پڑھ کے یاد آگئئ۔

” 1960 کی دہائی  کے اوائل میں  جب پنجاب یونیورسٹی  کے گیٹ کے برابر کھڑا بلند و بالا پیپل کا  پیڑ کاٹا گیا تو مجھے یوں لگا کہ شہر میں قتل کی کوئی واردات ہو گئی ہے اور بستی کے سر سے کسی ولی کا سایہ اُٹھ گیا ہے۔ "

شاعری پڑھیں: