قواعدِ زبان

ہر زبان کے کچھ اصول اور ضابطے ہوتے ہیں، جن کے پیشِ نظر اس زبان کو صحیح طور پر سیکھا، سمجھا اور بولا جاتا ہے۔ اور زبان کے بھی کچھ اصول اور ضابطے ہیں جنھیں قواعد یا گرامر کہا جاتا ہے۔ اِن پر عبور حاصل کرنے سے ہم اردو زبان کو ٹھیک ٹھاک بول اور سمجھ سکتے ہیں۔ قواعد کے دو حصّے ہوتے ہیں: 1۔ صرف 2۔ نَحو

قواعد کا وہ حصّہ جس میں مفرد الفاظ و حروف سے بحث کی جاتی ہے یعنی یہ لفظ واحد ہے یا جمع ، مذکر ہے یا مونث، فعل ہے یا حرف، صَرف کہلاتا ہے۔ اس حصّے میں صرف حروف و الفاظ و کلمات ہی موضوع بحث ہوتے ہیں۔ قواعد کاوہ حصّہ جس میں مرکّب جملوں اور عبارتوں سے بحث کی جاتی ہے، نَحو کہلاتا ہے مگر کہتے ہیں کہ:

"صَرف آتی ہے نہ بے عقل کو نَحو آتی ہے”

لفظ

سادہ آواز کو حرف کہا جاتا ہے۔ اردو میں بشمول الف ممدودہ اور ہمزہ حروفِ تہجی کی تعداد اڑتیس ہے۔ ان میں سے سترہ حروف منقوط اور اکیس حروف غیر منقوط ہیں ۔ علاوہ ازیں کچھ مخلوط حروف ہیں جنھیں دو چشمی "ہ” یا بھاری حروف بھی کہا جاتا ہے، ان کی تعداد پندرہ ہے وہ مرکّب آواز جو کچھ سادہ آوازوں سے مل کر بنتی ہے، اسے لفظ کہتے ہیں مثلاً: "علم” ایک لفظ ہے جو تین حروف (ع، ل، م) سے مل کر بنا ہے۔ اسی طرح "کھاٹ ایک لفظ ہے جو تین حروف (کھ، ا، ٹ) سے مل کر بنا ہے۔ جب چند الفاظ ایک خاص ترتیب سے جوڑ دیے جائیں تو وہ جملہ بن جاتا ہے۔

جُملہ

الفاظ کے ایسے مجموعے کو جس کا مفہوم واضح طور پر سمجھ میں آجائے ، جملہ کہتے ہیں۔مثلاً

آج موسم بڑا خوش گوار ہے۔ علم بڑی دولت ہے۔ سورج مشرق سے طلوع ہوتا ہے، وغیرہ۔ جملے کو فقرہ بھی کہتے ہیں۔

♦♦♦

کلمہ اور مہمل

الفاظ دو طرح کے ہوتے ہیں : بامعنی اور بے معنی ۔ با معنی لفظ کو کلمہ اور بے معنی لفظ کو مہمل کہتے ہیں۔ مثلاً پانی وانی ، روٹی ووٹی، چائے وائے ، غلط سلط ، بات چیت میں، بالترتیب پانی ، روٹی ، چائے غلط، بات کو کلمہ اور وانی ، ووٹی، وائے ، چیت کو مہمل کہیں گے۔ یادر ہے کہ اگر مہمل پہلے سے زبان زد عام نہیں تو عام طور پر اردو میں مہمل واؤ سے بناتے ہیں۔ جیسے : میزویز،

کرسی ورسی ، کھانا وانا وغیرہ۔

♦♦♦

مر کب اور ہم رتبہ جملے

جب دو یا دو سے زیادہ جملے مل کر کسی ایک مفہوم یا خیال کو ادا کریں تو وہ مرکب جملہ کہلائے گا۔ اگر یہ جملے نحوی اعتبار سے جدا گانہ اور برابر کی حیثیت رکھتے ہوں تو ایسے جملوں کو” ہم رتبہ “جملے کہیں گے۔ ہم رتبہ جملے حروف عطف کے ذریعے باہم ملے ہوتے ہیں۔

اردو میں ان کی چار قسمیں ہوسکتی ہیں:

وصلی جملے
تردیدی جملے
استدرا کی جملے
سبی جملے

ذیل میں بالترتیب ہر ایک کی دو دو مثالیں درج کی جاتی ہیں:

وصلی جملے :

میں آیا اور وہ چلا گیا۔
سورج صبح کو نکلتا اور شام کو غروب ہو جاتا ہے۔

تردیدی جملے :

اسے گھر بھیج دو یا با ہر نکال دو۔
حاکم ہمدرد ہونا چاہیے، ورنہ رعایا تباہ ہو جائے گی۔

استدرا کی جملے:

وہ وعدے تو بہت کرتا ہے لیکن یاد نہیں رکھتا۔
ہم نے چاہا تھا کہ مرجائیں ، سو وہ بھی نہ ہوا۔

سبی جملے:

میں اُن کا ساتھ دوں گا کیوں کہ مصیبت کے وقت انھوں نے میرا ساتھ دیا تھا۔
وہ بہت شریر اور نا اہل ہے، اس لیے میں اسے منھ نہیں لگانا۔

♦♦♦

کلمہ کی قسمیں

(1) اسم (۲) فعل (۳) حرف

اسم:

وہ کلمہ ہے جو کسی شخص کسی جگہ، چیز یا کیفیت کا نام ہو جیسے: محمود۔ لاہور۔ پنکھا یا نام کی جگہ استعمال ہو مثلاً وہ۔ وہاں۔

اسم کا زمانے سے تعلق نہیں ہوتا اور نہ ہی یہ اپنے معنی کے لیے دوسرے کا محتاج ہوتا ہے۔

فعل:

وہ کلمہ ہے جو اپنے معنی کے اعتبار سے مستقل ہو، جو کسی کام کا کرنا یانہ کرنا، ہونایا نہ ہونا بتائے اور جس میں تین زمانوں یعنی ماضی، حال اور مستقبل میں سے کوئی ایک زمانہ پایا جائے جیسے: آیا۔ جاتا تھا۔ لکھے گا۔

حرف

حرف وہ کلمہ جو اکیلا تو کچھ معنی نہ دے لیکن دوسرے کلمات کے ساتھ مل کر معنی دے اور ان میں تعلق بھی پیدا کرے۔ وہ اپنے معنی کے اظہار کے لیے دوسرے کلمات کا محتاج ہوتا ہے۔ جیسے: میں گھر سے مسجد تک گیا۔ اس میں سے اور تک دو حرف ہیں۔

♦♦♦

منقوط، غیر منقوط اور بھاری حروف تہجی

اردو زبان میں ہندی، عربی، فارسی ، انگریزی اور دیگر مقامی زبانوں کے علاوہ بھی کئی زبانوں کے الفاظ بھی شامل اور اس طرح گھل مل گئے ہیں کہ جب تک تفحص نہ کیا جائے معلوم بھی نہیں ہوتا کہ کون سا لفظ کس زبان کا ہے۔

اس خاصیت نے اردو کو مقبول اور دل پذیر زبان بنا دیا ہے اور ہر غیر زبان بولنے والے کو اردو میں اپنائیت کی خوشبو آتی ہے اور اگر وہ اردو زبان سیکھنا چاہے تو اردو بول چال میں جلد ہی قدرت حاصل کر لیتا ہے۔

دنیا کی تمام اہم زبانوں میں حروف ابجد دو طرح کے ہیں: کچھ منقوط اور کچھ غیر منقوط ۔ انگلش کے چھبیس بڑے حروف (Capital Letters) ہیں اور چھبیس ہی چھوٹے حروف (Small Letters) بڑے حروف میں سے کسی پر نقطہ نہیں آتا جب کہ چھوٹے حروف میں سے فقط دو حروف (I,J) ایسے ہیں جن پر نقطے ہیں مگر ہندی ، عربی اور فارسی میں منقوط حروف بہت زیادہ ہیں ۔ اردو کی یہ خاصیت ہے، جو مقبولیت کا بھی بڑا سبب ہے کہ اس میں متذکرہ تمام زبانوں کے حروف شامل ہیں ۔ اردو میں بشمول الف ممدودہ اور ہمزہ کل مفر و حروف کی تعداد اڑتیس ہے۔ جن میں سے سترہ منقوط اور اکیس غیر منقوط ہیں جب کہ پندرہ بھاری حروف ہیں۔ ان کی تفصیل یہ ہے:

منقوط حروف :

ب، پ، ت، ث، ج، چ، خ، ذ، ز، ژ، ش، ض، ظ، غ، ف، ق، ن (17)

غیر منقوط حروف :

ا، آ، ٹ، ح، و، ڈ، ر، ڈ، ، س، ص، ط، ع، ک، گ، ل، م، و، ه، ء، ی، ے (21)

بھاری حروف :

بھ، پھ، تھ، ٹھ، ٹھ، جھ، چھ، دھ، ڈھ، رھ، ڑھ، کھ، گھ، لھ، مھ، نھ (15)

اس طرح بشمول منقوط، غیر منقوط اور بھاری حروف ، حروف تہجی کی کل تعداد ۵۳ ہے اور وہ درج ذیل ہیں:

ا، آ،ب، بھ، پ، پھ، ت، تھ، ٹ، ٹھ، ث، ج، جھ، چ، چھ، ح، خ،د،دھ، ڈھ، ذ، ر، رھ، ڑ، ڑھ، ز، ژ، س، ش، ص، ض، ط، ظ، ع، غ، ف، ق، ک،کھ گ گھ ل ، لھ ، م ، مھ، ن، نھ، و، ه، ء، ی، ے

♦♦♦

حروف شمسی و قمری

عربی زبان کی ، جو ایک فصیح و بلیغ زبان ہے، ایک خصوصیت یہ ہے کہ اس میں بعض لفظوں میں امتیاز کرنے کے لیے الف لام لگا دیتے ہیں مگر کچھ حروف ایسے ہیں کہ اگر ان سے پہلے الف لام آتا تو ہے مگر تلفظ میں ظاہر نہیں کیا جاتا۔

شمسی حروف:

جن حروف کے شروع میں الف لام نہیں پڑھا جاتا، انھیں حروف شمسی کہتے ہیں۔ یہ نام اس لیے دیا گیا ہے کہ جب "الشمس” میں پہلے الف لام لگایا جاتا ہے، تو لام کی آواز ظاہر نہیں کی جاتی ۔

یہ اصول صرف عربی زبان کے الفاظ کے ساتھ مختص ہے۔ مگر چوں کہ اردو میں ایسے ان گنت عربی الفاظ آتے ہیں لہذا اس کی تصریح ضروری ہے۔ مثلاً : ہارون الرشید ، جبل الطارق اور ذوالنورین میں ربط اور ان سے پہلے الف لام لکھا تو ضرور جائے گا مگر پڑھا نہیں جائے گا۔ چنانچہ بشمول ان تین حروف کے حروف شمسی درج ذیل ہیں :

ت، ث، د، ذ، ر، ز، س، ش، ص، ض، ط، ظ، ل، ن = تعداد (14)

قمری حروف:

جن حروف میں لام کی آواز تلفظ میں ظاہر کی جاتی ہے، انھیں حروف قمری کہتے ہیں۔ کیوں کہ "القمر” پر جب الف لام لگائیں گے تو لام کی آواز ظاہر کی جائے گی۔

عبدالجلیل ، نورالعین اور بیت المال میں ج، ع اور م سے پہلے الف لام لکھا جائے گا اور پڑھا بھی جائے گا۔ اس طرح بشمول ان تین حروف کے حروف قمری مندرجہ ذیل ہیں:

ا، ب، ج، ح، خ، ع، غ، ف، ق، ک، م، و، ه ، ی = تعداد (14)

♦♦♦

اسم کی معنی کے لحاظ سے قسمیں

(۱) اسم معرفہ (۲) اسم نکرہ

اسم معرفہ

وہ اسم ہے جو کسی خاص چیز شخص یا جگہ کے خاص نام کو ظاہر کرے۔جیسے: کوہ ہمالیہ، بانگ درا، لاہور، محمود،

اسم معرفہ کو اسم خاص بھی کہتے ہیں۔

اسم معرفہ کی قسمیں:

(1) اسم علم (2) اسم ضمیر (3) اسم اشاره (4) اسم موصول

1۔ اسم عَلَم

وہ اسم ہے جو کسی شخص کے خاص نام کو ظاہر کرے جیسے: شاعر مشرق غالب ، مٹھو ، ابنِ قاسم شمس العما

اسم عَلَم کی قسمیں:

(1) خطاب (2) لقب (3) تخلص(4) کنیت (5) عرف

خطاب:

خطاب وہ اعزازی نام ہے جو کسی زمانے میں کسی شخص کو اس کی علمی وادبی وقومی خدمات یا کارہائے نمایاں کے اعتراف کے طور پر حکومت کی طرف سے دیا جاتا ہے۔ جسے شمس العلما، خان بہادر، سر، رستم زماں وغیرہ ۔ فی زمانہ پاکستان میں خطاب کے بجائے اعزاز دیا جاتا ہے۔ پاکستان کے سول اور ملٹری اعزازات مندرجہ ذیل ہیں :

ستارہ امتیاز تمغہ حسن کارکردگی ، تمغائے بسالت ، تمغائے پاکستان، اعزاز فضیلت ، نشان حیدر ، ہلال جرأت، ستاره جرات ، ستارہ امتیاز وغیرہ۔

تخلص:

وہ مختصر سا نام ہے جو شاعر یا ادیب اپنے کلام میں اصل نام کے بجائے استعمال کرتے ہیں۔ جیسے: ذوقؔ، غالبؔ،

حالیؔ ، حسرتؔ، اقبالؔ، فیضؔ وغیرہ۔

لقب:

وہ وصفی نام ہے جو کسی خاص خوبی یا خاص وصف کی وجہ سے قوم کی طرف سے دیا جائے اور مشہور ہو جائے جیسے:

نہ سلیقہ مجھ میں کلیمؑ کا ، نہ قرینہ تجھ میں خلیلؑ کا

میں ہلاک جادوئے سامری، تو قتیل شیوہ آزری

اس شعر میں کلیم حضرت موسی علیہ اسلام کا اور خلیل حضرت ابراہیم علیہ اسلام کا لقب ہے۔ اسی طرح امین، صادق، علامہ ، قائد اعظم، مادر ملت، شهید ملت، شاعر ، مزدور، بابائے اردو و غیر ہ بھی القابات ہیں۔

عرف:

عرف وہ نام ہے جو محبت یا حقارت یا پھر بلا وجہ مشہور ہو جائے ، جسے کلو ، کلیان، اچھا، فخرو، گاما ، بلا ، گوگا ، شرفو وغیرہ۔

کنیت:

کنیت وہ نام ہے جو باپ، ماں، بیٹے، بیٹی یاکسی اور تعلق کی وجہ سے پکارا جائے ۔ عرب ممالک میں اس کا بہت چلن ہے ۔ جیسے:

ابن مریم ہوا کرے کوئی

میرے دکھ کی دوا کرے کوئی

اس شعر میں ابن مریم حضرت عیسی علیہ السلام کی کنیت ہے اسی طرح ابو القاسم، ابن خطاب، ابوتراب، ابوالکلام، فاطمہ بنت عبداللہ خالد بن ولید محمد بن قاسم بھی کنیت ہیں۔ اردو میں اس کے بجائے منے کے اباء زین کی امیو غیر بولتے ہیں۔ بعض اوقات کنیت کسی معنوی رشتے کی بنا پر بھی کسی شخص کے لیے مخصوص ہو جاتی ہے۔ جیسے: ابو تراب، ابوہریرہ رضی اللہ عنہ ، ابوالاثر حفیظ جالندھری، ابوالکلام آزاد وغیرہ۔

2۔ اسم ضمیر

وہ اسم ہے جو کسی دوسرے اسم کی جگہ استعمال کیا جائے کیوں کہ تحریر وتقریر میں ایک نام کا بار بارلا نا معیوب سمجھا جاتا ہے مثلاًوہ، تُو، تم وغیرہ ، جیسے: ندیم آیا اس نے سبق پڑھایا اور وہ چلا گیا۔ اس میں اس اور وہ دونوں ضمیریں ہیں جو ندیم کی جگہ استعمال ہوئی ہیں۔ ضمیر جس کی جگہ استعمال ہوتی ہے اسے ”مرجع“ کہتے ہیں۔

اسم ضمیر کی قسمیں:

(1) ضمیر فاعلی (2) ضمیر مفعولی (3) ضمیر اضافی

ضمیر فاعلی :

وہ ضمیر ہے جو کسی فعل کا فاعل رہی ہو ۔ وہ یہ ہیں :

غائب:

واحد غائب: وہ۔ اس

جمع غائب: انھوں

حاضر:

واحد حاضر: تو

جمع حاضر: تم

متکلّم:

واحد متکلّم: میں

جمع متکلّم: ہم

ضمیر مفعولی:

ضمیر مفعولی وہ ضمیر جو مفعول کی جگہ استعمال ہوتی ہے۔ وہ یہ ہیں:

غائب:

واحد غائب: اُسے

جمع غائب: اُنھیں

حاضر:

واحد حاضر: تجھے

جمع حاضر: تمھیں

متکلّم:

واحد متکلّم: مجھے

جمع متکلّم: ہمیں

ضمیر اضافی:

وہ ضمیر ہے جو مضاف الیہ بن کر استعمال ہو ۔ وہ یہ ہیں :

غائب:

واحد غائب: اس کا

جمع غائب: ان کا

حاضر:

واحد حاضر: تیرا / تیری

جمع حاضر: تمھارا / تمھاری

متکلّم:

واحد متکلّم: میرا / میری

جمع متکلّم: ہمارا / ہماری

3۔ اسم اشارہ

وہ لفظ جو اشارہ کرنے کے لیے مقرر ہوں۔ اشارے دو طرح کے ہو سکتے ہیں یعنی قریب اور دور جیسے : وہ ۔ یہ ۔

"وہ” دور کی چیز کے لیے اور "یہ” نزدیک کی چیز کے لیے استعمال کیے جاتے ہیں۔ جس چیز کی طرف اشارہ کیا جائے اسے مشار الیہ کہتے ہیں۔ جیسے: وہ لڑکا ، یہ کتاب ، یہاں "وہ ” اور” یہ” اسم اشارہ ہیں ۔ لڑکا اور کتاب مشار الیہ۔ “

4۔ اسم موصول

وہ اسم ہے جسے کسی جملے کے ساتھ لگائے بغیر اس کے معنی سمجھ میں نہ آئیں وہ یہ ہیں : جو کوئی۔ جس، جسے ، جنھوں ، جنھیں ، جو کچھ ، جو چیز قواعد میں اسے ضمیر موصولہ یا اسم موصولہ بھی کہتے ہیں۔

♦♦♦

اسم نکرہ

وہ اسم ہے جو کسی عام چیز شخص، یا جگہ کے عام نام کو ظاہر کرے جیسے : پہاڑ، کتاب، شہر، آدمی۔ اسم نکرہ کو اسم عام بھی کہتے ہیں

اسم نکرہ کی قسمیں:

(1) اسمِآلہ

(2) اسمِ صوت

(3) اسمِ مصغّر

(4) اسمِ مکبّر

(5) اسمِ ظرف

1۔ اسمِ آلہ

اسم آلہ وہ اسم نکرہ ہے جو کسی اوزار یا ہتھیار کو ظاہر کرے جیسے: چاقو، قینچی، چھری ، تلوار، بندوق ، عربی اور فارسی کے اہم آلہ بھی اردو میں استعمال ہوتے ہیں جیسے : مقیاس الحرارت ( تھرمامیٹر) مسواک ۔ مقراض (قیچی) مسطر (فٹ رول)، پیمانه) قلم تراش(چاقو)وغیرہ۔

2۔ اسمِ صوت

اسم صوت وہ اسم نکرہ ہے جو کسی آواز کو ظاہر کرے جیسے : سائیں سائیں (ہوا کی آواز ) ۔کائیں کائیں ( کوے کی آواز )۔ چھم چھم (بارش کی آواز)۔ غُڑ غوں (کبوتر کی آواز )۔ ٹن ٹن ( گھنٹے کی آواز ) ۔کُو کُو ( کوئل کی آواز )

3۔ اسم مصغّر

وہ اسم نکرہ ہے جو کسی چیز کا چھوٹا پن ظاہر کرے جیسے: دیگچی، باغیچہ، غالیچہ ( چھوٹا قالین ) پیالی، بچونگڑا، ڈبیا، ڈھولک،مردوا ، پگڑی بکھڑا ، اسم مصغر بنانے کے لیے لفظ کے آخر میں کی، یا، ڈا، ڈی، چی، چہ ،ک کا اضافہ کیا جاتا ہے۔

4۔ اسمِ مکبّر

اسم مکبر وہ اسم نکرہ ہے جو کسی چیز کا بڑا پن ظاہر کرے جیسے : شہنشاہ ، شاہتوت ،شہتیر، شاہ رگ، شاه سوار، شہ زور، شه پر (بڑا پر) ، شاہکار مہاراج، گٹھڑ، بتنگڑ ، پگڑ، چھتر ۔ اسم مکتر بنانے کے لیے ”ی“ کی جگہ الف کا اضافہ کرتے ہیں جیسے : مکڑی سے مکڑا۔ بعض اوقات مہا کا بھی اضافہ کر دیا جاتا ہے۔ جیسے : مہاراجا،مہا کاج،مہا گرو وغیرہ۔

5۔ اسم ظرف

وہ اسم نکرہ ہے جس سے کوئی جگہ یا وقت ظاہر ہو جیسے : دفتر ، سکول، کارخانہ ، صبح ،شام ، آج کل۔

اسمِ ظرف کی قسمیں:

1۔ اسم ظرف مکاں، 2۔ اسم ظرف زماں

اسم ظرفِ مکاں

اسم ظرف مکاں وہ اسم نکرہ جو کسی جگہ کو ظاہر کرے جیسے : مسجد، مدرسہ، گھر ، اسٹیشن ،سبزی منڈی ، کان نمک، شفاخانه، عیدگاہ، کتب خانه، تار گھر، ڈاک خانہ، دارالحکومت، شکارگاہ ، مے خانہ ،منزل۔

اسم ظرفِ زماں

اسم ظرف زماں وہ اسم نکرہ جو کسی وقت کو ظاہر کرے جیسے صبح ، شام ، دوپہر، رات، دن ، سال، مینا، ہفتہ، منٹ ، سیکنڈ ، آج کل، صدی۔

♦♦♦

اسم کی ساخت کے اعتبار سے قسمیں

(1) اسمِ جامد (2) اسمِ مصدر (3) اسمِ مشتق

1۔ اسمِ جامد

اسم جامد وہ اسم ہے جو نہ تو خود کسی اسم سے بنا ہو اور نہ اس سے کوئی دوسرا اسم بنے جیسے : اینٹ ، پتھر ، درخت، چٹان ، پہاڑ ، وادی، چٹائی، میز، کرسی ، دیوار ، چھت وغیرہ۔

2۔ اسمِ مصدر

اسم مصدر: وہ اسم ہے جو خود تو کسی لفظ سے نہ بنے لیکن اس سے بہت سے اسم اور فعل بنیں جیسے : اچھلنا کودنا ، آنا ، جانا ،لکھنا، پڑھنا وغیرہ ۔ اُردو زبان میں ” نا ” مصدر کی علامت ہے لیکن کچھ الفاظ ایسے بھی ہیں جن کے آخر میں نا آتا ہے لیکن وہ مصدر نہیں ہوتے ۔ جیسے : گنا، کانا، نانا، پرانا، ، چونا، تانا بانا سونا ) سُونا ( گھرانا، یہ مصدر نہیں ہیں ۔

اسمِ مصدر کی قسمیں:

(1) مصدر مفرد (2) مصدر مرکب (3) مصدر لازم (4) مصدر متعدی

1۔ مصدر مفرد

وہ اسم جو شروع ہی سے مصدر کے معنی میں استعمال ہوتا ہے جیسے : آنا جانا لکھنا، پڑھنا، کہنا سننا وغیرہ

2۔ مصدر مرکب

وہ اسم ہے جو کسی مصدر کے شروع میں کوئی لفظ لگا کر دوسرا مصدر بنا لیتے ہیں اسے مصدر مرکب کہتے ہیں جیسے بہک جانا بھٹک جانا، کلمہ پڑھنا، قصیدہ لکھنا،سچ کہنا، جھوٹ بولنا وغیرہ۔

3۔ مصدر لازم

وہ فعل جوصرف فاعل کو چاہے فعل لازم کہلاتا ہے۔ چناں چہ جس مصدر سے فعل لازم بنے گا، وہ مصدر بھی لازم ہوگا جیسے آنا ، جانا، چلنا، دوڑنا، ہنسنا، رونا، بھاگنا، سونا، جاگنا،اچھلنا کودنا وغیرہ سب مصدر لا زم ہیں۔

4۔ مصدر متعدی

مصدر متعدی وہ مصدر ہے جس سے متعدی افعال بنتے ہیں اور متعدی فعل وہ ہے جو فاعل کے علاوہ مفعول کو بھی چاہے۔ جن مصادر سے یہ متعدی افعال بنیں گے وہ مصدر متعدی ہوں گے جیسے لکھنا، پڑھنا، کھانا، پینا، بیٹھنا، دوڑانا ، لانا، بھگانا اچھالنا،

نوٹ:

دیکھنا وغیرہ سب متعدی مصادر ہیں۔

یہ یادر ہے کہ مصدر لازم کو مصدر متعدی بنا لیتے ہیں جس کے مندرجہ ذیل طریقے ہیں:

مصدر لازم کی ”نا“ سے پہلے ”الف“ لگا دینے سے مصدر متعدی بن جاتا ہے جیسے : چلنا مصدر لازم سے چلانا مصدر متعدی اور ہنسنا مصدر لازم سے ہنسانا‘ مصدر متعدی بن جائے گا۔
مصدر لازم کے دوسرے حرف کے بعد ”الف“ لگا دینے سے مصدر متعدی بن جاتا ہے جیسے: اچھلنا سے اچھالنا مصدر متعدی بن جائے گا۔
مصدر لازم کے دوسرے حرف کے بعد "ی”لگا دینے سے مصدر متعدی بن جاتا ہے جیسے: سمٹنا سے سمیٹنا سکڑنا سے سکیڑنا“

3۔ اسمِ مشتق

اسم مشتق وہ اسم ہے جو خود تو مصدر سے بنے لیکن اس سے پھر کوئی لفظ نہ بنے جیسے : لکھنا سے لکھنے والا ، لکھنے والی لکھا ہوا لکھتا ہوا ا الفاظ بنتے ہیں لیکن آگے ان سے کوئی لفظ نہیں بنتا۔

اسمِ مشتق کی قسمیں:

(1) اسمِ فاعل (2) اسمِ مفعول (3) اسمِ حالیہ (4) اسم حاصل مصدر

اسمِ فاعل

اسم فاعل وہ اسم مشتق ہے جو کسی فاعل کو ظاہر کرے جیسے : وسیم لکھنے والا ۔ مقیم پڑھنے والا ۔ ان میں وسیم کو لکھنے والا اور مقیم کو پڑھنے والا کہ کر دونوں کا فاعل ہونا ظاہر کیا گیا ہے، اس لیے لکھنے والا اور پڑھنے والا اسم فاعل کہلاتے ہیں۔

اسم فاعل کی قسمیں

اسمِ فاعل قیاسی ۔ اسم فاعل سماعی

اسم فاعل قیاسی :

وہ اسم ہے جو قاعدے کے مطابق مصدر سے بنایا جائے جیسے: لکھنے والا ، پڑھنے والا

اسم فاعل قیاسی بنانے کا طریقہ: مصدر کے آخر سے ”الف“ ہٹا کر مذکر کے لیے ”ے والااور مؤنث کے لیے ”ے والی لگا دینے سے اسم فاعل بن جاتا ہے جیسے : پڑھنا سے پڑھنے والا اور پڑھنے والی لکھنا سے لکھنے والا اور لکھنے والی۔

اسم فاعل سماعی :

وہ اسم فاعل ہے جو کسی خاص قاعدے سے نہ بنا ہو بلکہ اہلِ زبان سے سننے میں آیا ہو مثلاً : لکڑ ہارا ، ترکھان ، بڑھئی، سنار، لوہار ،طبیب، تیراک ، پجاری، کھلاڑی، گویا ، حلوائی ، موچی، جلاہا، بھکاری، بھٹیارا ، سپیرا ، گھسیارا ، کسان ، جیب کترا ، ڈا کیا ،لٹیرا ، ڈاکو ، چور اچکا، جواری وغیرہ۔

اسم فاعل سماعی بنانے کا طریقہ: اس اسم فاعل کے بنانے کا کوئی خاص طریقہ نہیں بلکہ اہل زبان سے مختلف علامتوں کے لگانے سے اسم فاعل بنایا جانا منقول ہے۔ جیسے بھٹھیرا، لکڑ ہارا، رکھوالا ، حلوائی، دھوبی ، موچی، جوہری، سنار، پجاری، بھکاری ، بھٹیا را بسپیرا، گھسیارا ، ڈاکو، جیب کترا، چور، ڈاکیا، کھلاڑی، گویّا۔

فارسی کے بعض اسم ِفاعل بھی اردو میں مستعمل ہیں مثلاً : راہ بر، راہ نما سرمایہ دار، کتب فروش، خیر خواه، باغ بان ، تو پچی طلب گار باشنده، دانش ور جادوگر، جفت ساز، خدمت گار، پر ہیز گار وغیرہ۔ اس کے علاوہ عربی کے بعض اسم فاعل بھی اُردو میں بکثرت استعمال کیے جاتے ہیں جیسے: خادِم، حاکِم ، شاعِر ، کاتِب ، عادِل، عابِد ، ساجِد ، رازِق، خالِق ، قائِل ، معالِج ، مقابِل، مفاخِر، مفاسِد، ملازِم، محاِفظ، مجاِہد، مسافر، مونِس ،محسن ، موجِد، مُشفِق مُنصِف، منِکر، منّجِم، مصوِر، محقِّق، مبلِّغ ، ،مرتِّب، مصنِّف معلِّم متکبر متکلِم متحمِل متفکِر متوکِٗل وغیرہ۔

اسمِ فاعل اور فاعل میں فرق

اسمِ فاعل بنایا جاتا ہے لیکن فاعل بنایا نہیں جاتا بلکہ اس سے تو صرف فعل واقع ہوتا ہے۔
– اسمِ فاعل وہ ہے جو فاعل کو ظاہر کرے جب کہ فائل کام کرنے والے کو کہتے ہیں۔
اسم فاعل کو فاعل کی جگہ استعمال کر سکتے ہیں لیکن فاعل کبھی اسمِ فاعل کی جگہ استعمال نہیں ہوسکتا جیسے : لکھنے والے نے خط لکھا۔یہاں لکھنے والا اگر یہ اسم فاعل ہے لیکن فاعل بنا ہوا ہے۔

اسم مفعول

وہ اسم مشتق ہے جو کسی کا مفعول ہونا ظاہر کرے جیسے لکھا ہوا خط ، پڑھی ہوئی کتاب، ان جملوں میں لکھا ہوا اور پڑھی ہوئی اسمِ مفعول ہیں کیوں کہ یہ دونوں خط اور کتاب کا مفعول ہونا ظاہر کر رہے ہیں۔

اسم مفعول کی قسمیں :

1۔ اسم مفعول قیاسی

2۔ اسم مفعول سماعی

اسم مفعول قیاسی

وہ اسم مشتق ہے جو قاعدے کے مطابق مصدر سے بنایا جائے۔ اسمِمفعول قیاسی بنانے کا طریقہ: جس مصدر سے اسم مفعول بنانا ہو اس کی ماضی مطلق کے آخر میں ہوا لگا دینے سے اسمِ مفعول بن جاتا ہے جیسے : لکھنا سے لکھا ہوا اور لکھی ہوئی۔ پڑھنا سے پڑھا ہوا اور پڑھی ہوئی اسم مفعول بن گئے۔

اسم مفعول سماعی

وہ اسم ہے جو کسی قاعدے سے بنایا تو نہیں جاتا لیکن معنی اسم مفعول کے دیتا ہے۔ مثلاً )نک کٹا(ناک کٹا ہوا) کن چھدا ( کان میں سوراخ کیا ہوا ) بیا ہتا ( شادی کی ہوئی) دکھی (ستایا ہوا وغیرہ

فارسی کے اسم مفعول اردو میں بھی استعمال ہوتے ہیں جیسے )اندوختہ (جمع کیا ہوا) آموختہ ( پڑھا ہوا) آزمودہ ( آزمایا ہوا) شنیده (سناہوا و غیره

عربی کے اسم مفعول اردو میں بھی کثرت سے استعمال کیے جاتے ہیں جیسے : مظلوم مخلوق، معبود، معلوم ،مقتول ، مقتدر، منتشر منتخب منتظر وغیرہ۔

اسم مفعول اور مفعول میں فرق:

1۔ اسم مفعول وہ ہے جو مفعول کو ظاہر کرے اور مفعول اسے کہتے ہیں جس پر کوئی فعل واقع ہوا ہو۔

2۔اسم مفعول مصدر سے بنایا جاتا ہے لیکن مفعول بنایا نہیں جاتا۔

3۔ اسم مفعول کو مفعول کی جگہ استعمال کر سکتے ہیں لیکن مفعول کبھی اسم مفعول کی جگہ استعمال نہیں ہوسکتا جیسے : میں نے لکھا ہوا پڑھا، بچہ

پڑھا ہوا بھول گیا۔ ان جملوں میں لکھا ہوا، پڑھا ہوا دونوں اسم مفعول ہیں جو مفعول کی جگہ استعمال ہوئے ہیں۔

اسم حالیہ

وہ اسم مشتق ہے جو کسی فاعل یا مفعول کی حالت بیان کرے جیسے نعیم ہنستا ہوا آیا۔ وسیم نے کامران کو پڑھتے ہوئے دیکھا۔ پہلے جملے میں ہنستا ہوا ” فاعل نعیم کی حالت بیان کر رہا ہے۔ دوسرے جملے میں پڑھتے ہوئے کامران جو کہ مفعول ہے، کی حالت بیان کر رہا ہے لہذا ”ہنستا ہوا اور پڑھتے ہوئے دونوں اسم حالیہ ہیں۔

اسم حالیہ بنانے کا طریقہ :

مصدر کے آخر سے’نا ‘ہٹا کر ‘تاہوا’ لگا دینے سے اسم حالیہ بن جاتا ہے جیسے لکھنا سے لکھتا ہوا لکھتی ہوئی، پڑھنا سے پڑھتا ہوا، پڑھتی ہوئی اسم حالیہ ہیں۔

اسم ِحاصل مصدر

وہ اسم مشتق ہے جو مصدر تو نہ ہو لیکن معنی اور اثر مصدر کا ظاہر کرے، مثلاً آہٹ (آنا) ، لڑائی ( لڑائی لڑنا) ، دباؤ (دبانا) ۔ چناں چہ آہٹ، لڑائی اور دباؤ اسمِ حاصل مصدر ہیں۔

حاصل مصدر بنانے کے طریقے :

بعض مصدروں کے آخر سے الف ہٹا کر جو باقی رہے وہ حاصل مصدر بن جاتا ہے جیسے : جلنا سے جلن، چلنا سے چلن ، دکھنا سے دکھن ،لگنا سے لگن، چھنا سے چھن ۔
بعض مصدروں کے آخر سے نا ہٹا کر باقی جور ہے وہ حاصل مصدر بن جاتا ہے جیسے : دوڑنا سے دوڑ ، چاہنا سے چاہ ، بھا گنا سے بھاگ ، دیکھنا سے دیکھ حاصل مصدر ہیں ۔
بعض مصدروں کے آخر سے نا ہٹا کر ”و“لگا دینے سے حاصل مصدر بن جاتا ہے جیسے دبانا سے دباؤ ، جھکانا سے جھکاؤ۔ بہانا سے بہاؤ۔ لگانا سے لگاؤ۔
بعض مصدروں کے آخر سے ”نا“ ہٹا کروٹ لگا دینے سے حاصل مصدر بن جاتا ہے جیسے : ملانا سے ملاوٹ، گرانا سے گراوٹ، بنانا سے بناوٹ ،سجانا سے سجاوٹ ۔
بعض مصدروں کے آخر سے ”نا“ہٹا کر ہٹ لگا دینے سے حاصل مصدر بن جاتا ہے جیسے گھبرانا سے گھبراہٹ مسکرانا ہےمسکراہٹ، آنا سے آہٹ۔
بعض مصدروں کے آخر سے نا ہٹا کر آئی لگا دینے سے حاصل مصدر بن جاتا ہے جیسے : لڑنا سے لڑائی ، رنگنا سے رنگائی، پڑھنا سے پڑھائی ، لکھنا سے لکھائی ، پٹنا سے پٹائی۔
لڑکپن، بچپن، اپنائیت، چاہت، چال یہ سب بھی حاصل مصدر ہیں ۔
– فارسی کے حاصل مصدر اردو میں بھی حاصل مصدر ہی شمار ہوں گے جیسے : گفت گو جستجو، آمد و رفت ، آزمائش، پیمائش و غیره –
عربی کے حاصل مصدر اردو میں بھی حاصل مصدر کے طور پر ہی استعمال ہوں گے جیسے : شرافت، جہالت، جماعت علم عمل وغیرہ

اسمِ معاوضه:

وہ اسم مشتق ہے جو کسی کام یا کسی خدمت کی اجرت اور بدلے کے معنی دے مثلاً پسوائی۔ دھلائی۔

اسم معاوضہ بنانے کا طریقہ

: مصدر کے آخر سے نا ہٹا کر ائی لگا دینے سے اسم معاوضہ بن جاتا ہے جیسے : رنگوانا سے رنگوائی لگوانا سے لگوائی، دھلانا سے دھلائی، اٹھوانا سے اٹھوائی، پسوانا سے پسوائی وغیرہ

اسم صِفَت :

وہ اسم ہے جس سے کسی کی اچھی یا بری حالت ظاہر کی جائے مثلاً نیک لڑکا، اونچی دیوار، ان میں نیک اور اونچی اسم صفت ہیں جس کی اچھی یا بری حالت ظاہر کی اسے اسم موصوف کہتے ہیں جیسے : اوپر کی مثالوں میں لڑکا اور دیوار اسم موصوف ہیں۔

اسم صِفَت کی قسمیں

1۔ صفتِ اصلی، 2۔ صفتِ نسبتی

صفت اصلی

وہ اسم ہے جو زبان میں شروع سے کسی کی اچھائی یا برائی بیان کرنے کے لیے استعمال کیا جائے جیسے: اچھا۔ برا۔

نیک۔ بد۔ تیز شست ۔

صِفت اصلی کے تین درجے

1۔ صفتِ نفسی، 2۔ صفتِ بعض، 3۔ صفتِ کُل

صفت نفسی

وہ اسم صفت ہے جس سے کسی کی حالت کسی دوسرے اسم سے بغیر مقابلہ کے ظاہر کی جائے جیسے: اچھا، برا، اونچا، نیچا، نیک، بد، خوب صورت و غیره

صِفَتِ بعض

وہ اسم صفت جس سے کسی ایک کو دوسرے سے بڑھایا جائے مثلاً : ، نیک تر۔اس سے اونچا

صفت گل

وہ اسم صفت ہے جس سے ایک کو دوسرے سب سے بڑھایا جائے جیسے سب سے اونچا، بلند ترین ، نیک ترین۔

مفت نسبتی

وہ اسم صفت ہے جو صفت تو نہ ہو لیکن محض تعلق کی وجہ سے صفت کے معنی ظاہر کرے جیسے لاہوری نمک، عربی آدمی۔ ان دونوں میں لاہوری کا لفظ لاہور سے اور عربی کا لفظ عرب سے تعلق ظاہر کرنے کی وجہ سے صفت نسبتی کہلاتے ہیں۔

صفت نسبیتی بنانے کا طریقہ

بعض اسموں کے آخر میں ہی لگا دینے سے صفت نسبتی بن جاتی ہے جیسے: لاہور سے لاہوری، ملتان سے ملتانی قصور سے قصوری۔
اگر کسی اسم کے آخر میں ا، لف،ہہوں تو الف ، اور ‘ہ کو ‘و’سے تبدیل کر کے ‘ی’ نسبتی لگائی جائے گی جیسے : بھیرہ سے بھیروی، ڈسکہ سے ڈسکوی ، گولٹرہ سے گولڑوی صفت نسبتی بنائی جائے گی۔
بعض اسموں کے آخر میں ‘انہ’ لگا دینے سے صفت نسبتی بن جاتی ہے جیسے : شاگرد سے شاگردانہ، استاد سے استادانہ، عالم سے عالمانہ مرد سے مردانہ، ماہ سے ماہنامہ، دوست سے دوستانہ، جاہل سے جاہلانہ وغیرہ
بعض اسموں کے آخر میں ”انی لگا دینے سے صفت نسبتی بن جاتی ہے جیسے: نور سے نورانی ، روح سے روحانی۔

یہ ہندی ، وہ خراسانی ، یہ افغانی ، وہ تورانی

تو اے شرمندہ ساحل! اُچھل کر بے کراں ہو جا

علامہ اقبال کے اس شعر میں اسی قاعدے سے بنائے ہوئے الفاظ خراسانی ، افغانی اور تو رانی ایسے اسم صفت ہیں جن کی نسبتخراسان، افغان اور تو ران سے ظاہر کی گئی ہے۔

بعض اسموں کے آخر میں ‘ین’لگا دینے سے صحت نسبتی بن جاتی ہے جیسے : رنگ سے رنگین ، سنگ سے سنگین ، نمک سے نمکین ، زر سے زریں وغیرہ

مکہ اور مدینہ کی صفت نسبتی خلاف قیاس مکہ سے مکی اور مدینہ سے مدنی استعمال کی جاتی ہے۔
یہ الفاظ بھی صفت نسبتی ہیں : مٹیالا ، جیالا ، شرمیلا، رنگیلا، زہریلا، سنہری ہٹیالا ، جیالا، گنوار، پچیرا، ممیراوغیرہ

♦♦♦

فعل

فعل وہ کلمہ ہے جس سے کسی کام کا کرنا یا ہونا کسی زمانے میں معلوم ہو جیسے: نعیم آیا۔ طاہر نے کتاب پڑھی۔ فعل کا تعلق زمانے کے ساتھ ہوتا ہے اور زمانے کی تین قسمیں ہیں۔

زمانہ ماضی

جوگزر چکا ہے اسے زمانہ ماضی کہتے ہیں۔

زمانہ حال

وہ زمانہ جو موجود ہے،اسے زمانہ حال کہتے ہیں۔

زمانه مستقبل

آیندہزمانے کو زمانہ مستقبل کہتے ہیں۔

فعل کی قسمیں

1۔ فعل ماضی، 2۔ فعل حال، 3۔ فعل مستقبل، 4۔ فعل مضارع، 5۔ فعل امر، 6۔ فعل نہی، 7۔ فعل لازم، 8۔ فعل متعدی، 9۔ فعل معروف، 10۔ فعل مجہول، 11۔ فعل تام، 12۔ فعل ناقص

یہ یادر ہے کہ فعل کے لیے فاعل کی بھی مختلف حالتیں ہوتی ہیں مثلاً غائب ، حاضر ، متکلم اور پھر واحد ہوگا یا جمع ہوگا چناں چہ فعل کی چھے صورتیں اور درجے ہو جائیں گے جیسے :

واحد غائب۔ جمع غائب۔ واحد حاضر۔ جمع حاضر۔ واحد متکلم۔ جمع متکلم۔

ان در جوں کو صیغے کہتے ہیں کسی فعل کو ان صیغوں میں تبدیل کرنا گردان کہلاتا ہے۔

فعل ماضی

وہ فعل ہے جس سے کسی کام کا کرنا یا ہونا گزرے ہوئے زمانے میں معلوم ہو جیسے : ندیم گیا۔ فریدہ خط لکھتی تھی۔

فعل ماضی کی قسمیں

ماضی مطلق۔ ماضی قریب۔ ماضی بعید۔ ماضی شکیہ۔ ماضی تمنائی۔ ماضی استمراری

ماضی مطلق

وہ فعل ہے جس میں کسی کام کا کرنا یا ہونا صرف گزرے ہوئے زمانے میں معلوم ہو لیکن یہ معلوم نہ ہو کہ گزرا ہوا زمانہ نزدیک کا ہے یا دور کا۔ مثلاً وہ آیا ۔ تم گئے۔

ماضی مطلق بنانے کے طریقے

بعض مصدروں کے آخر سے ”نا“ ہٹا کر ”الف“ لگا دینے سے ماضی مطلق بن جاتی ہے جیسے: لکھنا سے لکھا۔ پڑھنا سے پڑھا۔ دوڑ نا سے دوڑا۔ لکھا، پڑھا اور دوڑ ا ماضی مطلق ہے۔

بعض مصدروں کے آخر سے نا ہٹا کر یا لگا دینے سے ماضی مطلق بن جاتی ہے جیسے : کھانا سے کھایا۔ رونا سے رویا۔ آنا سے آیا۔ کھایا، رویا اور آیا ماضی مطلق ہے۔
جانا اور کرنا مصدر کی ماضی مطلق ان کے خلاف آتی ہے جانا سے ” گیا ماضی مطلق ہے اور کرنا سے کیا ماضی مطلق ۔

ماضی قریب

ماضی قریب وہ فعل ہے جس سے کسی کام کا کرنا یا ہونا نز دیک سے گزرے ہوئے زمانے میں معلوم ہو جیسے: ندیم آیا ہے۔ فرح گئی ہے۔

ماضی قریب بنانے کا طریقہ :

ماضی مطلق کے آخر میں ‘ہے’ لگا دینے سے ماضی قریب بن جاتی ہے۔

ماضی بعید

ماضی بعید و فعل ہے جس سے کسی کام کا کرنا یا ہونا د یر کے گزرے ہوئے زمانے میں معلوم ہو جیسے : علی نے لکھا تھا۔

ماضی بعید بنانے کا طریقہ :

ماضی مطلق کے آخر میں ‘تھا ‘لگا دینے سے ماضی بعید بن جاتی ہے۔

ماضی شکیہ

وہ فعل ہے جس سے کسی کام کے کرنے یا ہونے کا گزرے ہوئے زمانے میں شک معلوم ہو ۔ جیسے: اس نے خط لکھا ہوگا۔

ماضی شکیہ بنانے کا طریقہ :

ماضی مطلق کے آخر میں ‘ہو گا’ لگادینے سے ماضی شکیہ بن جاتی ہے۔

ماضی تمنائی:

وہ فعل ہے جس سے گزرے ہوئے زمانے میں کسی کام کی آرزو تمنا یا شرط معلوم ہو جیسے: کاش ! وہ محنت کرتا۔ اگر وہ آتا۔

ماضی تمنائی یا شرطیہ بنانے کا طریقہ

مصدر کے آخر میں نا ہٹا کر تا’ لگا’ دیتے ہیں اور شروع میں ‘ کاش یا اگر لگا’ دیتے ہیں۔ اس طرح ماضی تمنائی یا شرطیہ بن جاتی ہے۔

ماضی استمراری

ماضی استمراری و فعل ہے جس سے کسی کام کا کرنا گزرے ہوئے زمانے میں لگا تار اور مسلسل معلوم ہو جیسے : وہ لکھتا تھا۔ وہ لکھتا رہا تھا۔

ماضی استمراری بنانے کا طریقہ

مصدر کے آخر سے نا ہٹا کر ‘تا تھا یا رہا تھا’ لگا دینے سے ماضی استمراری بن جاتی ہے۔

فعل حال

وہ فعل ہے جس سے کسی کام کا کرنا یا ہونا موجودہ زمانے میں معلوم ہو جیسے: فوزیہ کتاب پڑھتی ہے۔ فریدہ مضمون لکھ رہی ہے۔ فعل حال بنانے کا طریقہ : مصدر کے آخر سے ا ہٹا کر تا ہے لگادینے سے فعل حال اور رہا ہے لگادینے سے فعل حال جاری بن جاتا ہے۔

فعل مستقبل

وہ فعل ہے جس سے کسی کام کا کرنا یا ہونا آئندہ زمانے میں معلوم ہو جیسے : رضوان ملتان جائے گا۔

فعل مستقبل بنانے کا طریقہ :

مصدر کے آخر سے نا’ ہٹا’ کر گا’ لگا’ دینے سے فعل مستقبل بن جاتا ہے۔

فعل مضارع

وہ فعل ہے جس سے کسی کام کا کرنا یا ہونا موجودہ اور آئندہ زمانے میں معلوم ہو جیسے: عدنان آئے ۔ وہ کھائے وہ کھائیں تو کھائے آئے، فعل مضارع ہے۔

فعل مضارع بنانے کا طریقہ

مصدر کے آخر سے ہٹا کر ہے لگا دینے سے فعل مضارع بن جاتا ہے۔

فعل امر

وہ فعل ہے جس سے کسی کام کے کرنے یا ہونے کا حکم معلوم ہو جیسے : تو آ۔ تم کھاؤ۔

فعل امر بنانے کا طریقہ

مصدر کے آخر سے نا ہٹا کر جو باقی بچے فعل امر واحد حاضر کا صیغہ ہوگا۔ فعل امر کے حقیقت میں دو صیغے واحد حاضر اور جمع حاضر ہوتے ہیں کیوں کہ حکم حاضر اور موجود کو دیا جاتا ہے چناں چہ باقی صیغے فعل مضارع کے استعمال کیے جاتے ہیں۔

فعل نہی

وہ فعل ہے جس سے کسی کام کے نہ کرنے یا نہ ہونے کا حکم معلوم ہو جیسے: تو نہ جا۔ تم مت آؤ۔

فعل نہی بنانے کا طریقہ

:فعل امر کے شروع میں "نہ” یامت لگا دینے سے فعل نہی بن جاتا ہے۔ اس کی حالت بھی فعل امر کی طرح ہے۔

فعل لازم

وہ فعل ہے جو صرف فاعل کو چاہے جیسے: ندیم ہنسا۔ گھوڑا دوڑا۔ ان دونوں جملوں میں ہنسا اور دوڑا دونوں فعل لازم ہیں کیوں کہ ندیم اور گھوڑا دونوں فاعل ہیں جن کا ذکر کر دینے کے بعد فعلوں کے معانی پورے ہو گئے۔ آیا۔ گیا۔ دوڑا۔ چلا۔ ہنسا۔ رویا۔ بھا گا وغیرہ سب فعل لازم ہیں۔

فعل متعدی

وہ فعل ہے جو فاعل کے ساتھ مفعول بھی چاہے جیسے : استاد نے سبق پڑھایا۔ اس جملے میں پڑھا یا فعل متعدی ہے۔ استاد فاعل ہے جس کے ذکر کرنے کے بعد سبق جو مفعول ہے کے ذکر کیے بغیر فعل کے معنی مکمل نہیں ہوتے ۔ چناں چہ لکھا۔ پڑھا۔ کھایا۔ پیا۔ بیٹھا۔ دیکھا وغیرہ سب فعل متعدی ہیں۔

فعل معروف

وہ فعل ہے جس کا فاعل معلوم ہو جیسے طاہرہ آئی۔ اس جملے میں ” آئی، فعل معروف ہے کیوں کہ اس کا فاعل ”طاہرہ معلوم ہے۔

فعل مجهول

وہ فعل ہے جس کا فاعل معلوم نہ ہو جیسے : ”خط لکھا گیا اس جملے میں لکھا گیا، فعل مجہول ہے۔ کیوں کہ اس کا فاعل معلوم نہیں ہے۔ فعل مجہول جس اسم پر واقع ہوتا ہے اسے نائب فاعل یا مفعول مالم یسم فاعلہ کہتے ہیں۔ فعل مجہول ہمیشہ فعل متعدی سے بنتے ہیں۔ فعل لازم سے مجہول نہیں بنتا۔

فعل مجہول بنانے کا طریقہ:

جس مصدر سے فعل مجہول بنانا ہو پہلے اس مصدر کو مصدر مجہول بنالیں جس کا طریقہ یہ ہے کہ اس مصدر کی ماضی مطلق کے آخر میں ” جانا لگا کر پہلے مصدر مجہول بنایا جائے اس کے بعد مذکورہ بالا طریقوں سے تمام قسم کے فعل مجہول بن جائیں گے جیسے : لکھنا مصدر سے فعل مجہول بنانے کے لیے اس مصدر کو مجہول بنایا لکھا جانا جس سے مثلاً ” لکھا گیا ماضی مطلق مجہول بن گئی اسی طرح دوسرے افعال بھی مجہول بن جاتے ہیں۔

فعل تام

وہ فعل ہے جو اگر فعل لازم ہے تو فائل کا ذکر کر دینے کے بعد اس کے معنی مکمل ہو جائیں جیسے: سعید آیا۔ یہاں آیا فعل تام“ ہے۔سعید فاعل“ کے ذکر کر دینے کے بعد اس کے معنی پورے ہو گئے اور اگر فعل متعدی ہے تو فاعل اور مفعول دونوں کا ذکر کر دینے کے بعد اس کے معنی مکمل ہو جا ئیں جیسے : اسلم نے خط لکھا۔ اس جملے میں لکھا فعل تام ہے کیوں کہ اسلم ” فاعل اور خط مفعول” کے بعد معنی مکمل ہو گئے۔ یہ فعل

تام کہلاتے ہیں۔

فعل ناقص

وہ فعل ہے جس کے ساتھ ایک اسم ذات کا ذکر کرنے کے بعد جب تک دوسرے اسم صفت کا ذکر نہ کیا جائے اس کے معنی مکمل نہ ہوں جیسے ندیم نیک ہے ۔ ” ہے فعل ناقص ہے ندیم کے اسم کا ذکر کرنے کے بعد جب تک نیک اسم صفت کا ذکر نہیں کیا گیا اس کے معنی مکمل نہیں ہوئے۔ فعل ناقص یہ ہیں: ہے۔ ہیں۔ ہوا۔ ہوئے۔ ہوگا۔ ہوگی ۔ہو گئیں ۔ تھا۔ تھیں ۔ رہا۔ بنا۔ نکلا سہی وغیرہ

افعال معاون

افعال معاون یا امدادی افعال سے ایسے افعال مراد ہیں جو دوسرے فعلوں کے ساتھ مل کر مرتب فعل بناتے ہیں جیسے ہنسا سے ہنس پڑا، دیکھا سے دیکھ چکا ، رویا سے رونے لگا ، پکارا اسے پکار اٹھا سنا سے سن سکا ، رکھا سے رکھ لو ، چلا سے چل دیا ، لیٹا سے لیٹ گیا مارا سے مارڈالا، پیا سے پی لیا ، سنایا سے سنانا چاہا وغیرہ۔ ان تمام مثالوں میں دو دو فعل استعمال ہوئے ہیں، ہر دوسرا فعل، فعلِ معاون ہے جو اصل فعل کے ساتھ مل کر مرکب فعل بناتا ہے۔ عام طور پر فعل معاون اصل فعل کے بعد ہی آتا ہے جیسا کہ مندرجہ بالا مثالوں سے ظاہر ہے۔