صنائع بدائع

اصطلاح میں علمِ صنائع بدائع اُس علم کو کہتے ہیں جس سے تحسین و تزئین کلام کے طریقے معلوم ہوتے ہیں۔ صنائع بدائع کی بہت سی قسمیں ہیں جن میں سے چند کا ذکر ذیل کی سطور میں کیا جاتا ہے:

 تلمیح 

کسی بات کو اچھی طرح سمجھانے کی ایک تدبیر یہ بھی ہے کہ اسے کہانی یا گذشتہ سنےاور دیکھے ہوئے واقعے کے حوالے سے واضح کیا جائے ۔ یہ وضاحت دو طرح سے ہوتی ہے۔ پہلے یہ سننے والے کو پورا قصہ سنایا جائے پھر اس سے موجودہ صورت حال کی مطابقت سمجھائی جائے۔ اس کے بعد نتیجے کی یکسانیت پر روشنی ڈالی جائے یا دوسرے یہ کہ اس قصے کی جانب محض اشارہ کر دیا جائے اور نتیجے کی یکسانیت واضح کی جائے ۔ مثالیں:

1۔  حضرت ابراہیم خلیل اللہ علیہ السلام اللہ کے بڑے بلند مرتبہ رسول تھے لوگوں کو اللہ کی طرف بلاتے اور سچی راہ دکھاتے تھے۔ ایک مرتبہ نمرود نے آپ کو ختم کرنے کا منصوبہ بنایا۔ لکڑیوں سے میدان بھر کر آگ لگوائی ۔ جب لکڑی جل چکی اور انگارے دہکنے لگے تو بادشاہ کے حکم سے حضرت ابراہیم علیہ السلام کو ایک خاص اہتمام سے آگ میں پھینک دیا گیا۔ لیکن اللہ تعالی کے حکم سے آگ ٹھنڈی ہو گئی۔ اور اس میدان میں آگ کے بجائے چمن لہلہانے لگا۔ حضرت ابراہیم علیہ السلام کسی تکلیف کے بغیر وہاں سے نکل آئے۔

 اس واقعے سے یہ نتیجہ نکلتا ہے کہ انسان کا عقیدہ پکا اور خدا پر بھروسا ہو یا دوسرے لفظوں میں یہ کہ انسان کو اپنے مقصد سے عشق اور خلوص ہو تو دنیا کی مصیبتوں کا کیا ذکر ہے آگ بھی گلزار بن سکتی ہے۔ ہاں عشق صادق اور ارادہ پختہ نہ ہو تو آدمی ہمیشہ بحث مباحثہ اور دعوے دلیل ہی میں الجھا رہتا ہے کوئی کام نہیں کر سکتا۔

اس طویل عبارت اور لمبی چوڑی تقریر کو علامہ اقبال نے دو مصرعوں میں لکھا اور مذکورہ بالا واقعہ بیان کیے بغیر واضح کر دیا:

 بے خطر کود پڑا آتش نمرود میں عشق

 عقل ہے محو تماشائے لپ بام

 ابھی آتشِ نمرود میں کودنا حضرت ابراہیم علیہ السلام کے کمال ایمان اور عشق الہی میں پختگی کے مشہور امتحان کی طرف اشارہ ہے۔ واقعہ آپ نے پڑھا ہے اور سب کو معلوم ہے۔

2۔  حضرت یوسف علیہ السلام اپنے والد کے بہت پیارے بیٹے تھے یہ محبت بھائیوں کو نا پسند تھی۔ ایک مرتبہ سب بھائیوں نے حضرت یوسف” کے خلاف سازش کی اور انھیں سیر و تفریح کے بہانے گھر سے لے جا کر ایک کنویں میں ڈال دیا ۔ واپس آئے تو حضرت یعقوب علیہ السلام سے جھوٹ موٹ کہ دیا: "یوسف کو بھیڑیا کھا گیا۔ حضرت یعقوب یہ خبر سن کر نڈھال ہو گئے ، مدتوں روتے رہے گھر اجڑ گیا۔ ادھر حضرت یوسف علیہ السلام بے حد مصیبتوں میں مبتلا ہوئے۔ غلام بنائے گئے بازار میں بیچے گئے قید و بند میں رہے۔

 اسی طرح کی مصیبتیں حامد پر گزررہی ہیں۔ عزیزوں اور بھائیوں نے جینا دوبھر کر دیا ہے ۔ اسی بات کو یوں بھی کہا جاسکتا ہے: حامد بھرے پڑے خاندان کا آدمی ہے مگر وہ سب برادران یوسف ہیں۔ اس محسن بیان اور خوب صورتی کا نام تلمیح ہے۔ 

تلمیح  نظم و نثر میں ایک لفظ یا چند مختصر الفاظ کے ذریعے سے کسی مشہور آیت روایت واقعے یا تاریخی سانحے کی طرف اشارہ کرنا۔

 کیا فرض ہے کہ سب کو ملے ایک سا جواب

 آؤ نہ ہم بھی سیر کریں کوہ طور کی

کوہ طور

 وہ پہاڑ جہاں حضرت موسیٰ علیہ السلام اللہ سے کلام کرتے تھے۔ ایک دن آپ نے امت کے کہنے سے اللہ کے حضور درخواست کی کہ مجھے اپنا دیدار عطا فرمائیے ۔ جواب ملا "لن ترانی ولكن انظر الى الجبل فان استقر مکانہ فسوف ترانی “ ( تم مجھے ہرگز نہیں دیکھ سکتے، لیکن پہاڑ کی طرف دیکھو اگر یہ اپنی جگہ برقرار رہ گیا تو پھر دیکھ سکو گے ) اس کے بعد ایک چمک ہوئی، پہاڑ سرمہ ہو گیا۔ حضرت موسیٰ علیہ السلام بے ہوش ہو گئے۔ قرآن مجید میں یہ واقعہ بیان کیا گیا ہے۔ اردو میں بہت سی تلمیحوں کے حوالے سے: ارنی ۔لن ترانی۔ کوہ طور۔تجلی۔ تجلّی کی تاب نہ لا نا۔ طور سینا۔ مناجاتِ موسیٰ علیہ السلام۔ آرزوئے دیدار ۔ برقِ طُور وغیرہ تلمیحات اسی طرف اشارہ کرتی ہیں۔

ابنِ مریمؑ ہوا کرے کوئی 

میرے دکھ کی دوا کرے کوئی

(غالب) 

عیسیٰ علیہ السلام بیماروں کو چھو لیتے تو مرض جاتا رہتا تھا، مردے کو” قم باذن الله “ اللہ کے حکم سے اٹھ بیٹھ) فرمایا تو مردہ زندہ ہو گیا۔ اس بات کے لیے بہت سی تلمیحیں استعمال ہوتی ہیں ۔ عیسیٰ نفس ۔ دم عیسیٰ ۔ اعجازِ مسیحا۔

اک کھیل ہے اور نگ سلیمان  میرے نزدیک

 اک بات ہے  اعجازِ مسیحا میرے آگے

اور نگ سلیمان :

 حضرت سلیمان علیہ السلام اللہ کے محبوب نبی تھے ۔ آب و ہوا جن و بشر خشک وتر کی بادشاہت ملی ہوئی تھی، پرندوں کی بات سمجھتے اور جنات پر حکومت کرتے تھے۔ آپ کا تخت ( اور نگ ) ہوالے کر چلتی تھی۔ آپ کے پاس ایک انگوٹھی تھی اور انگوٹھی میں ایک نقش تھا جس کے اثر سے جن و پری آپ کے فرماں بردار تھے۔ حضرت سلیمان علیہ السلام سے متعلق یہ تلمیحات ہیں۔نقش سلیمان – تخت سلیمان۔ ہدیہ مورِ سلیمان ۔ چیونٹی اور سلیمان۔ بلقیس وسلیمان ۔ ہُد ہُد اور سلیمان۔

آب حیات، آب حیوان،  چشمہ حیوان ، آب بقا

 کہتے ہیں کہ طویل اور تاریک راستے کے بعد ایک چشمہ ہے جس کا پانی پینے والا کبھی نہیں مرتا۔ ایک مرتبہ حضرت خضر ؑ سے سکندر نے وہاں جانے کی خواہش کی۔ آپ نے فرمایا میں تجھے وہاں لیے تو چلتا ہوں لیکن کچھ شرطیں ہیں۔ سکندر نے شرطیں مان لیں، لیکن جب ظلمات میں داخل ہوا تو ہمت ہار گیا اور راستے ہی سے واپس آ گیا۔ حضرت خضر نے چشمے پر پہنچ کر پانی پیا۔ اس لیے خضر و سکندر کا ذکرِ راہنمائی ، سکندر کا چشمہ آب حیات سے پیاسا پلٹنا وغیرہ کو تلمیحات کی حیثیت حاصل ہے۔ صبر ایوب۔ ناله یعقوب۔ نغمہ داؤد۔ ملک سلیمان جیسی بے شمار تلمیحیں گذشتہ پیغمبروں اور پرانی امتوں کے واقعات سے متعلق رائج ہیں۔ 

خیبر شکن :

 حضرت علیؑ نے خیبر کی جنگ میں یہودیوں کے قلعہ قموص کو فتح کیا اور قلعے کا بہت بھاری درواز و توڑا اور اپنے ہاتھ سے اٹھا کر پھینک دیا۔ اس جنگ میں مرحب وعنتر نامی بہادروں کو تلوار سے قتل کیا۔ علامہ اقبال کے ذیل کے شعر میں مرجبی، عنتری ، حیدری جیسی تلمیحات سے مذکورہ حقائق مراد ہیں۔

 نه ستیزہ گاہ جہاں نئی نہ حریف پنجہ فگن نئے

 وہی فطرت اسدا للّٰہی ، وہی مرجبی وہی عنتری

 کر بلا ذبح عظیم :

 امام حسینؑ دس محرم ۶۱ ھ کو کر بلا نامی میدان میں یزید کے حکم سے شہید کر دیے گئے۔ اس واقعے سے تعلق رکھنے والی بہت سی تلمیحات اردو میں استعمال ہوئی ہیں۔ مثلاً شاہ شہیداں ، شام غریباں، صبح عاشور وغیرہ۔

گنج بخش 

جناب سید علی ہجویری کی کرامت اور گنج شکر بابا فرید الدین کی کرامت و عطا کی تلمیح ہے۔

مذہبی تلمیحات کے علاوہ کیلئے مجنوں ۔ شیریں فرہاد ۔ سسّی پنوں ۔ ہیر رانجھا۔ محمود و ایاز ۔ مانی و بہزاد ۔ لنکا ڈھانا۔ ہفت خواں رستم ۔ جام جمشید ۔ تیشہ و فرہاد۔ آئینہ سکندری۔ ناچ نہ جانے آنگن ٹیڑھا۔ ٹیڑھی کھیر ۔ جون پور کا قاضی بھی تلمیحات کے طور پر استعمال کی جاتی ہیں۔

♦♦♦