محاورے کی تعریف

محاورہ کے لغوی معنی بات چیت کرنا کے ہیں مگر زبان کی اصطلاح میں جب کوئی کلام دو یا دو سے زیادہ الفاظ سے مرکب ہو اور اہلِ زبان کی بول چال کے مطابق ہو اور اپنے لغوی معنوں کے بجائے مجازی(مراد: فرضی، غیر حقیقی، مصنوعی) معنی دیتا ہو تو وہ محاورہ کہلاتا ہے۔ جیسے "پانی پینا” محاورہ نہیں ہے اس لیے کہ یہاں پینا اپنے حقیقی معنوں میں استعمال ہوا ہے۔ اس کے برعکس غصہ پینا، آنسو پینا وغیرہ محاورے ہیں کیوں کہ یہ اہلِ زبان کی بول چال کے مطابق ہیں اور اپنے مجازی معنوں میں استعمال ہوتے ہیں۔

محاورے میں ایک لفظ عموماً مصدر کی صورت میں ہوتا ہے اور جملے میں اس مصدر کے تمام مشتقات استعمال کیے جاسکتے ہیں۔ مثلاً غم کھانا سے غم کھایا، غم کھایا ہو گا، غم کھاتا ہے، غم کھائے گا، غم کھانا پڑے گا وغیرہ البتہ محاورے کے الفاظ میں ازروئے قیاس تبدیلی کرنا ہر گز مناسب نہیں اور نہ ہی لفظوں کی ترتیب بدلنا جائز ہے۔ جیسے: "گل کھلانا” کی جگہ "پھول کھلانا” درست نہ ہو گا۔ اسی طرح "موت نے اس کا گھر دیکھ لیا ہے” کی جگہ "موت نے مکان دیکھ لیا ہے” کہنا غلط ہے۔

ذیل میں طالب علموں کی سہولت کے لیے کچھ چیدہ چیدہ مگر زبان زدِخاص و عام محاورات ، ان کے معنی اور انھیں جملوں میں استعمال کر کے دکھایا گیا ہے۔ انھیں بغور دیکھیے اور ازبر کر لیجیے، کیوں کہ کسی بھی زبان پر اس وقت تک عبور حاصل نہیں ہوتا جب تک محاورات اور ان کے صحیح اور بر محل استعمال پر قدرت حاصل نہ ہو۔

روزمرہ اور محاورے میں فرق

محاورہ کی تعریف اوپر بیان کی جا چکی ہے۔ اب آتے ہیں روزمرہ کی تعریف دیکھتے ہیں اور ان کا فرق جانتے ہیں۔

روزمرہ اس بول چال اور اسلوب بیان کو کہتے ہیں جو خاص اہلِ زبان استعمال کرتے ہیں اس میں قیاس کو دخل نہیں بلکہ سماعت پر دارومدار ہے۔

روزمرہ اہلِ زبان کی اس بات چیت کا نام ہے۔ جس کے مطابق بولنا ہی درست تسلیم کیا جائے۔ روزمرہ میں الفاظ کے استعمال کا ایک خاص انداز ہوتا ہےلیکن وہ الفاظ اپنے لغوی اور اصلی معنی دیتے ہیں۔ تحریر و تقریر میں اور نظم و نثر میں جہاں تک ممکن ہو، روزمرہ کی پابندی کو ضروری سمجھا جاتا ہے۔ جس قدر روزمرہ کی پابندی کم ہو گی، اسی قدر وہ فصاحت کے درجے سے ساقط سمجھا جائے۔ روزمرہ قواعدِ زبان کے اصولوں سے بالا ہے یعنی اس پر قواعد کے اصول و ضوابط کا اطلاق نہیں ہوتا بلکہ اس کے لیے کسوٹی اہلِ زبان کا اسلوب بیان ہی ہے۔

• ہر محاورہ روزمرہ ہوتا ہے لیکن ہر روزمرہ کا محاورہ ہونا ضروری نہیں ہوتا۔

• روزمرہ میں الفاظ لغوی اور اصلی معنی دونوں دیتے ہیں جبکہ محاورہ میں لغوی معنی کی بجائے صرف مجازی معنی دیتے ہیں۔

مثالیں

"میری چشم میں درد ہے” یہ جملہ روزمرہ کے خلاف ہے کیوں کہ اہلِ زبان اس طرح کبھی نہیں بولتے۔ درست یوں ہے : ” میری آنکھ میں درد ہے”

"عابد اور ساجد کی عمروں میں اٹھارہ بیس کا فرق ہے "(غلط)۔ "عابد اور ساجد کی عمروں میں انیس بیس کا فرق ہے "(درست)۔

"لڑکی نے دوپٹا پہنا”(غلط)۔ "لڑکی نے دوپٹا اوڑھا۔ "(درست)

"آپ نا وقت آئے ہیں”(غلط)۔ "آپ بے وقت آئے ہیں”(درست)

"میرے ساتھ چار پانچ مت کرو”(غلط)۔ "میرے ساتھ تین پانچ مت کرو”(درست)

اردو محاورات کا جملوں میں استعمال

"آ” سے شروع ہونے والے محاورات

"ا ” سے شروع ہونے والے محاورات

ماخذ:کتاب، کلید اردو