30 اردو محاورات، معنی اور جملے | Muhavare In Urdu | مشہور اردو محاورات اور ان کے جملے

اس پوسٹ میں ن، و، ہ اور ی سے شروع ہونے والے محاورات، معنی اور جملے شامل کیے گئے ہیں۔ یہ محاورے تمام کلاسز کے لیے کار آمد ہیں۔ اس سے پہلےاس سیریز کی چھٹی پوسٹ۔ “7- اردو محاورات (Muhavare in Urdu)” ۔ میں ک، گ، ل اور م سے شروع ہونے والے محاورات، معنی اور جملے شامل کیے گئے ہیں۔

حروف “ن، و اور ی” شروع ہونے والے محاورات، معنی اور جملوں میں استعمال

نظر لگنا
نظر بد کا اثر ہو جانا
نا جانے کس کی نظر لگی ہے ، گھر کا سکون برباد ہو گیا ہے۔

ناک بُھوں چڑھانا
تیوری چڑھانا/ بُرا منانا
عزیزم! کھانے پینے کی چیزوں پر ناک بھوں نہ چڑھایا کرو، جو ملے کھا لیا کرو۔

ناکوں چنے چبوانا
بہت دق کرنا/بہت تنگ کرنا
کچھ افسروں کی یہ عادت ہوتی ہے کہ وہ اپنے ماتحتوں کو ناکوں چنے چبواتے ہیں، چنانچہ وہ مقبول نہیں ہوتے!

نہال کرنا
خوش کرنا
تم نے میری خواہش پوری کر دی، خدا تمھیں نہال کرے!

نو دو گیارہ ہونا
رفو چکر ہونا
ڈاکو قافلے کو لوٹ کر نو دو گیارہ ہو گئے۔

نالش کرنا
مقدمہ دائر کرنا
نوبت یہاں تک آ پہنچی کہ دوست نے دوست پر نالش کر دی۔

نخاس چڑھانا
رسوائے عام ہونا
پاکستانی اشرافیہ کی بد عنوانیاں کوئی ڈھکی چھپی نہیں بلکہ ہر جگہ ان کا نخاس چڑھ چکا ہے۔

ننانوے کے پھیر میں پڑنا
روپیا جمع کرنے کی فکر میں پڑنا
وہ شخص تمام عمر نناوے کے پھیر میں پڑا رہا ہے اور اب تنہا ہے۔

نو تیرہ بائیس بتانا
ٹرخانا، ٹالنا
میں نے ضرورت پڑنے پر دوست سے کچھ رقم کا تقاضا کیا مگر اس نے نو تیرہ بائیس بتا کر مجھے فارغ کر دیا۔

وبالِ جان ہونا
مصیبت کا باعث ہونا
بری صحبت میں پڑنے کے باعث دونوں لڑکے والدین کے لیے وبالِ جان بنے ہوئے ہیں۔

وضع بدلنا
طور طریقے بدلنا
اگر تم اپنی وضع بدلنے پر راضی ہو جاؤ تو پھر میں بھی اپنے رویے پر نظر ثانی کر لوں گا۔

وقت کاٹنا
وقت گزارنا
امیری ہو یا غریبی، بہرحال وقت کاٹنا پڑتا ہے۔

واہی تباہی بکنا
بیہودہ باتیں کرنا
وہ طیش/غصے میں آ کر واہی تباہی بکنے لگا۔

وارے نیارے ہونا
خوب فائدے اٹھانا
ا ن دنوں کاروباری لوگوں کے وارے نیارے ہیں۔

وجد میں آنا
مست ہو جانا
قوالی سن کر لوگ وجد میں آ گئے۔

ہ، ی سے شروع ہونے والے محاورات، معنی اور جملوں میں استعمال

ہاتھ بٹانا
مدد کرنا
گھر آ کر امی کا ہاتھ بٹایا کرو۔

ہاتھ اٹھانا
دست بردار ہونا۔ الگ ہونا
ہم نے تو پہلے ہی اس ذمہ داری سے ہاتھ اٹھا لیا تھا۔

ہوا دینا
اشتعال دینا/اکسانا
وہ پہلے ہی بھرا بیٹھا ہے، تم معاملے کو مزید ہوا دے رہے ہو۔

ہاتھ رنگنا
نفع کمانا
چینی کے تاجروں نے اس سال خوب ہاتھ رنگے ہیں۔

ہاتھ مَلنا
پچھتانا
سوچ سمجھ کر کام کیا کرو، بعد میں سوائے ہاتھ ملنے کے کچھ نہیں رہ جاتا۔

ہاتھوں کے طوطے اڑنا
حواس باختہ ہونا/ حیران و پریشان ہونا
ماں نے بچے کے گم ہونے کی خبر سُنی تو اس کے ہاتھوں کے طوطے اڑ گئے۔

ہوا سے باتیں کرنا
بہت تیز ہونا
چین کی ٹرینیں ہو اسے باتیں کرتی ہیں۔

ہتھیلی پر سرسوں جمانا
نہایت پھرتی سے کوئی کام کرنا
بھائی صاحب! یہ کام ذرا دیر طلب ہے۔ جلدی نہ کیجیے، ہتھیلی پر سرسوں نہیں جمائی جا سکتی۔

ہاتھ پاؤں مارنا
کوشش کرنا
بیچارے احمد نے ملازمت کے حصول کے لیےبہت ہاتھ پاؤں مارے لیکن کامیابی نہ ہوئی۔

ہوائی قلعے تعمیر کرنا
زبانی منصوبے بنانا
زندگی عمل سے بنتی ہے۔ ہوائی قلعے تعمیر کرنے سے کچھ حاصل نہیں ہونا۔

ہُو کا عالم ہونا
اجاڑ سنسان ہونا
جنگل میں ایک ہُو کا عالم تھا، دور دور تک کسی جاندار کا کوئی نشان نہ تھا۔