ذو معنی الفاظ اور با ہم مماثل و متشابہ الفاظ

ذو معنی الفاظ

وہ الفاظ جن کے دو یا دو سے زیادہ معنی ہوں، ذومعنی یا ذو معنین الفاظ کہلاتے ہیں۔ ایسے بعض الفاظ ایک معنی میں مذگر ہوتے ہیں تو دوسرے معنی میں مؤنث بعض اوقات دونوں معنوں میں مذکر ہوتے ہیں یا مؤنث،ذو معنی الفاظ کے ضمن میں بہت احتیاط برتنے کی ضرورت ہے اور اس کے لیے کسوٹی اہلِ زبان کی گفت گو( تحریر وتقریر ) ہی ہے۔ بعض ذو معنی الفاظ کی ایک مختصری فہرست اور ان کے معنی درج ذیل ہیں:

آب: پانی ۔ چمک دمک

اردو: لشکر ۔ زبان

اوقات: وقت کی جمع ۔ حیثیت

بار: بوجھ ۔ باری

بیت: گھر ۔ شعر

باز: ایک شکاری پرندہ ۔ پرہیز ۔ دوبارہ ۔ کھلا ہوا

قصور: قصر کی جمع بمعنی محلّات ۔ غلطی

تکیہ: بھروسا ۔ سرہانہ

کل: مشین ۔ آرام ۔ دوسرا دن (گزشتہ یا آیندہ)

محل: بڑا شاندار مکان ۔ موقع

طاق: محراب ۔ ہندسہ جو دو پر تقسیم نہ ہو۔

عرصہ: مدّت ۔ میدان

عرض: چوڑائی۔ التماس

ظرف: برتن ۔ حوصلہ

غریب: نادر ۔ مفلس

تاک: انگور کی بیل ۔تاک جھانک

کف: جھاگ ۔ ہتھیلی

تکرار: جھگڑا ۔ بار بار دہرانا

جست: ایک دھات ۔ چھلانگ

مِثل: مانند ۔ کاغذات

چشمہ: عینک ۔ پانی کا چشمہ

مغرب: مقامِ غروبِ آفتاب ۔ بوقتِ شام

جھوٹا: جھوٹ بولنے والا ۔ بچا ہوا کھانا

روزگار: زمانہ ۔ کاروبار

شہادت: گواہی ۔ راہِ حق میں جان فدا کرنا

مشتری: ایک سیّارے کانام ۔ خریدار

مہر: سورج ۔ عنایت

نظم: انتظام ۔ شاعری

ولی: مالک ۔ دوست ۔ خدا رسیدہ

ہار: گلے میں پہننے کا زیور ۔ شکست

♦♦♦

با ہم مماثل و متشابہ الفاظ

بعض الفاظ کی آواز تقریباً ایک جیسی ہوتی ہے یا ان کے اعراب میں معمولی سا فرق ہوتا ہے مگر وہ معنوں کے اعتبار سے ایک دوسرے سے قطعی مختلف ہوتے ہیں۔ ایسے الفاظ کو مماثل یا متشابہ الفاظ کہا جاتا ہے۔ مماثل الفاظ کے استعمال میں بڑی احتیاط کی ضرورت ہے۔ طلبہ کی سہولت کے لیے اہم مماثل و متشابہ الفاظ کی ایک نا تمام فہرست درج ذیل ہے:

اَلم: رنج

علَم: جھنڈا

ارض: زمین

عرض: چوڑائی یا درخواست

آر: اوزار کا نام

عار: شرم و حیا

اثر: نتیجہ

عصر: زمانہ

اَسرار: سِرّ کی جمع بہ معنی بھید

اِصرار: ضد یا تکرار

اصل: جڑ یا بنیاد

عسل: شہد